SQO-da drondar naqty ýaqyt rejıminde sý tasqynyn baqylaýǵa aldy
PETROPAVL. KAZINFORM – Soltústik Qazaqstan oblysynda drondardyń kómegimen tasqyndy baqylaý boıynsha ınnovatsııalyq joba iske qosyldy.
SQO ákimdiginiń málimetinshe, bul joba «Birtutas dron ınfraqurylymy» dep atalady, Prezıdenttiń tapsyrmasy boıynsha júzege asyp otyr. Jańa joba óńirge jumys saparymen kelgen Premer-Mınıstr Oljas Bektenovke tanystyryldy. Búgin ony Tótenshe jaǵdaılar mınıstri Shyńǵys Árinov jáne óńir basshysy Ǵaýez Nurmuhambetov SQO ákimdigi janyndaǵy jańa sıtýatsııalyq ortalyqta iske qosty.
Drondar arqyly tasqyn jaǵdaıy táýlik boıy, naqty ýaqyt rejıminde baqylanady. Qazir barlyǵy 8 dron tasqyn bolýy múmkin qaýipti aımaqtardy áýeden baqylaýǵa alǵan, olar:
* Taıynsha qalasy mańyndaǵy Shaǵalaly ózeni;
* Toqsan bı, Músirepov aýdanynyń mańynda Esil ózeni;
* Sergeev sý qoımasy
* Esil aýdanyndaǵy Pokrovka eldi mekeni mańy;
* Novonıkolskoe kópiri;
* Teplıchnoe jáne Prıbrejnoe eldi mekenderi mańy;
* Bolshaıa Malyshka aýyly mańy;
* Petropavldaǵy Zarechnyı, Bylǵary kenti jáne Ýşev, 0,8 km kósheleri.
- Drondar avtomatty zarıadtaý júıesimen, jylý beıneleý júıelerimen jabdyqtalǵan. Bul olardyń kez kelgen jaǵdaıda jumys isteýine múmkindik beredi. Olar sý deńgeıiniń ózgerisi men múmkin bolatyn qaýip týraly jedel aqparatty áýeden jetkizedi. Bul qyzmet tez áreket etýge jáne jedel sheshimder qabyldaýǵa múmkindik beredi. Drondardy paıdalaný tasqyndardy boljaý dáldigin jaqsartyp, óńir turǵyndary úshin yqtımal zardaptardy azaıtýǵa kómektesedi, - dep jazdy oblys ákimi Ǵaýez Nurmuhambetov áleýmettik jelidegi paraqshasynda.
SQO ákimdigi janyndaǵy sıtýatsııalyq ortalyq barlyq aqparattyq júıeni biriktirgen negizgi analıtıkalyq jáne úılestirýshi býyn. Mundaı tásil naqty ýaqyt rejıminde kóptegen baǵyt boıynsha jaǵdaıdy baqylaýǵa jáne barlyq memlekettik organ áreketin úılestirýge múmkindik beredi.
Buǵan deıin SQO-da ámbebap qutqarý bólimshesi ashylǵanyn jazǵan edik.