SQO-da dinı mazmundaǵy materıaldar taratqan er adam jarty mln teńge aıyppul tóledi
Soltústik Qazaqstan oblysy polıtsııa departamenti baspasóz qyzmetiniń málimetinshe, anyqtalǵan derekterdiń basym bóligi dinı mazmundaǵy materıaldardy taratýmen jáne satýmen baılanysty.
Petropavldyń 56 jastaǵy turǵyny 500 myńnan astam teńge aıyppul tóledi. Áleýmettik jelilerge monıtorıng júrgizý barysynda er adamnyń «YouTube» jáne «VKontakte» arnalaryna dinı mazmundaǵy beınematerıaldar salǵany anyqtaldy. Ol bıyl dál osyndaı quqyq buzýshylyǵy úshin jaýapkershilikke tartylǵan. Alaıda, odan sabaq almaı, dinı mazmundaǵy aýdıofaıldardy taratýyn toqtatpaǵan.
Sondaı-aq, dinı kitaptardy satqany úshin jeltoqsan aıynda taǵy eki áıel ákimshilik jaýapkershilikke tartyldy. Olar ádebıetterdi «OLX» saıtynda saýdalaǵan. Sot olarǵa aıyppul saldy.
«Dinı qyzmet jáne dinı birlestikter týraly» QR 2011 jylǵy 11 qazandaǵy zańnamasynyń 9-babyna sáıkes, dinı ádebıetterdi, basqa da dinı mazmundaǵy aqparattyq materıaldardy, dinı maqsattaǵy zattardy ǵıbadat úılerinde, dinı bilim berý uıymdarynda, sondaı-aq oblystardyń, respýblıkalyq mańyzy bar qalalardyń, astananyń jergilikti atqarýshy organdary arnaıy belgilegen statsıonarlyq úı-jaılarda ǵana taratýǵa ruqsat etilgenin eske salamyz. SQO ákimdiginiń qaýlysyna sáıkes, búgingi kúni SQO aýmaǵynda osyndaı 15 nysan jumys isteıdi», - deıdi SQO PD Ekstremızmge qarsy is-qımyl basqarmasynyń bastyǵy Rýslan Jarasbaev.
