SQO-da dinı kitap satqan úsh adam aıyppul tóledi

PETROPAVL. QazAqparat – Soltústik Qazaqstan oblysynda jyl basynan beri ruqsatsyz dinı mazmundaǵy ádebıet pen jazbalardy taratqan 5 adam ákimshilik jazaǵa tartyldy, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, zań buzýshylardyń basym bóligin tártip saqshylary áleýmettik jeli men ınternetke monıtorıng júrgizý barysynda anyqtady.

Mamlıýtka qalasynyń 31 jastaǵy turǵyny «VKontakte» jelisi arqyly dinı mazmundaǵy aýdıo jáne beınejazbalar taratqan. Ákimshilik jazaǵa tartylǵan ol endi 120 myń teńge aıyppul tóleıdi.

Al Petropavldyń eki turǵyny ınternet resýrstardyń biri arqyly dinı mazmundaǵy basylymdardy satpaq bolǵan. Bul da áleýmettik jelige monıtorıng barysynda anyqtaldy. Osy derekke baılanysty ákimshilik materıal jınaldy.

«Dinı ádebıetti jáne dinı mazmundaǵy basylymdy satýǵa arnaıy ruqsaty bar resmı oryndar ǵana sata alady. Soǵan qaramastan mundaı ádebıetti ınternet arqyly satatyndar bar. Dinı ádebıet pen basqa da materıaldardy elge kirgizip, taratqandarǵa ákimshilik jaza bar ekenin eskertemiz. Jeke tulǵalarǵa 50 AEK, al zańdy tulǵalarǵa 200 AEK mólsherinde aıyppul salynady», - deıdi oblystyq PD Ekstremızmge qarsy is-qımyl basqarmasynyń bastyǵy Rýslan Muhambetjanov.

Al Qyrǵyzstanǵa tranzıt arqyly ótpek bolǵan 35 jastaǵy er adam 200 myń teńge aıyppul tóledi. Odan Qazaqstan aýmaǵynda tyıym salynǵan «Tablıǵı Jamaǵat» destrýktıvti dinı aǵymnyń kitaptary tabylǵan.