SQO-da din týraly zańdy buzýǵa qatysty 6 derek anyqtaldy
SQO Polıtsııa departamenti baspasóz qyzmetiniń málimetinshe, ınternetke monıtorıng júrgizý kezinde tártip saqshylary «VKontakte» áleýmettik jelisinde zań buzýshylyqty anyqtady. Qoldanýshy jeke paraqshasynda dinı mazmundaǵy foto men aýdıojazbalardy ornalastyrǵan.
Ekstremızmge qarsy is-qımyl basqarmasynyń qyzmetkerleri «Qazaqstan Respýblıkasynyń dinı qyzmet jáne dinı birlestikter týraly zańnamasyn buzý» boıynsha óndiris qozǵady. Faıldar dintaný zertteýine jiberildi. Eger atalǵan materıaldar saraptamamen dinı dep tanylsa, er adamǵa 50 AEK (1 AEK – 2 917) mólsherinde aıyppul salynýy múmkin.
Petropavl turǵyny ınternette habarlandyrý boıynsha dinı kitapty satpaqshy bolǵan.
«Qazaqstandaǵy dinı qyzmet zańnamamen retteledi. Ǵıbadat úılerinde, dinı bilim berý uıymdarynda, sondaı-aq jergilikti atqarýshy organdarmen belgilengen arnaıy úı-jaılarda dinı ádebıetti, dinı mazmundaǵy basqa da materıaldardy, dinı maqsattaǵy zattardy taratýǵa ruqsat etilgen. Basqa jerlerde satqan jaǵdaıda zań buzýshylyq bolyp sanalady», - deıdi Ekstremızmge qarsy is-qımyl basqarmasy bóliminiń bastyǵy Marat Halımýlın.
SQO aýmaǵynda dinı ádebıetti ǵıbadat úılerinen bólek, 15 saýda ornynda satýǵa ruqsat berilgen. Saýda oryndary oblys ákimdiginiń 2021 jylǵy 8 qańtardaǵy qaýlysymen bekitildi.
Jyl basynan SQO polıtseıleri din salasyndaǵy zańnamany buzýǵa qatysty 6 derekti anyqtady.
