SQO-da dıqandar bıyl egistikti azaıtyp, maıly daqyl men kókónis alqabyn ulǵaıtpaq

PETROPAVL. KAZINFORM – Soltústik Qazaqstan oblysynda bıyl 4,4 mln ga alqapqa dán egý josparlanǵan, bul byltyrǵydan myń ga az.

Búgin ákimdiktiń keńeıtilgen otyrysynda ótken jyl qorytyndylanyp, bıylǵy jospar aıtyldy.

SQO ákiminiń birinshi orynbasary Marat Tasmaǵanbetov aýyl sharýashylyǵy salasyna toqtaldy.

Aıtýynsha, bıyl 3,3 mln ga astyq, 760 myń ga – maıly daqyl, bul byltyrǵydan shamamen 86 myń ga artyq jáne ótken jylmen salystyrǵanda 38 myń ga artyq - 392 myń ga jemazyq egý josparlanǵan. Sondaı-aq kartop alqaby 2,2 myń ga ulǵaıyp, 9,7 myń ga, kókónister alqaby 0,5 myń ga ulǵaıyp, 1,5 myń ga egilmek.

- Bylyr jaqsy ónim alyndy, alaıda bıdaı pen arpa baǵasy túsip ketti, byltyr 60 myń teńge bolsa, bıyl 50 myń teńgeden alynyp jatyr. Al maıly daqyldar baǵasy kerisinshe shamamen 10 % ósken, tonnasy 190-200 myń teńge turady. Munyń bári eskerilip, maıly daqyldar alqaby ulǵaıtylýy tıis. Bul sharýashylyqtardyń kirisin eki ese arttyrady. Alaıda ónimdi satý, daqyldyń árkelki pisýine baılanysty tehnıkany tıimdi qoldaný jáne jergilikti zaýyttardy shıkizatpen qamtý máselesin sheshý qajet, - dedi Marat Tasmaǵanbetov.

Jaqsy ónim alý úshin agrotehnologııany saqtaý qajet. Byltyr dıqandar shamamen 257 myń ga mıneraldy tyńaıtqysh engizdi, bıyl onyń kólemin 333,5 myń tonnaǵa jetkizbek.

Kóktemgi egiske 470 myń tonna tuqym ázirlendi.

- Byltyr 49,1 myń tonna elıtalyq tuqym sebildi. Osylaısha tuqym 10,1% jańartyldy. Bıyl 52,5 myń tonna joǵary ónimdi tuqym qoldanylmaq, nátıjesinde elıtalyq tuqymnyń úlesi 11,2% jetedi. Soltústik Qazaqstan aýyl sharýashylyǵy tájirıbelik stantsııasy mamandary «Semenovna» atty bıdaıdyń sapaly jańa sortyn shyǵardy. Bıyl bul kásiporyn fermerlerge 10 túrli elıtalyq sorttyń 10 myń tonnasyn berýge ázir, - dedi Marat Tasmaǵanbetov.

Qazirgi ýaqytta óńirde attestatsııadan ótken 35 tuqym sharýashylyǵy bar.

Buǵan deıin astyq bazalary 2024 jyly ónim qabyldaý kólemin eki esege arttyrǵanyn jazǵan edik.