Alty qabyrǵasy synǵan: SQO-da buqa súzgen er adam aýrýhanaǵa tústi

PETROPAVL. KAZINFORM – Soltústik Qazaqstan oblysynda 51 jastaǵy er adamdy buqa súzip, aýyr jaraqat aldy.

Kópbeıindi Petropavl qalalyq jedel medıtsınalyq járdem aýrýhanasyna oblys turǵyny keýde qýysynyń sol jaǵynyń qatty aýyratynyna shaǵymdanyp, kómekke júgindi.

Aıtýynsha, ony birneshe kún buryn buqa súzgen. Er adam ózdiginen basylady dep, aýyrsynýdy basatyn dári qabyldaǵan. Biraq aýyrǵany kúsheıgenidikten, ol emdeý mekemesine kelýge májbúr bolǵan. 

Jaraqat pýnktinde naýqasty travmatolog, terapevt pen hırýrg qarap-tekserdi. Keýde qýysyna rentgenografııa jasalyp, onyń sol jaqtaǵy alty qabyrǵasynyń synǵany anyqtaldy. Ókpeniń qabyný qaýpi men asqynýlardyń damýy eskerilip, naýqas jedel túrde travmatologııa bólimshesine jatqyzyldy.

Mamandardyń aıtýynsha, statsıonarda ol únemi baqylaýda boldy, aýyrsynýdy basatyn, asqynýǵa qarsy jáne tynys alý terapııasyn qabyldady. Búginde jaǵdaıy jaqsaryp, qanaǵattarlyq kúıde aýrýhanadan shyqty, desek te endi ol úıde ambýlatorııalyq em qabyldap, tynys alý gımnastıkasyn jasaýy tıis. 

Dárigerler bir qaraǵanda «aýyr emes» jaraqat qaýipti bolýy múmkindigin eskertedi. Qabyrǵa synǵan jaǵdaıda ol ishki múshelerdi jaraqattaıdy jáne dárigerlerdiń baqylaýyn qajet etedi.

Buǵan deıin SQO-da tórt adam donerden ýlanyp qalǵanyn jazǵan edik.