SQO-da brakonerlerdiń kinásin dáleldeý úshin DNK-saraptamasyn jasatýǵa týra keldi

PETROPAVL. QazAqparat – Soltústik Qazaqstan oblysynda úsh sibir eligin atyp alǵan brakonerlerdiń kinásin dáleldeý úshin polıtseılerge birqatar saraptamany, sonyń ishinde DNK-ny jasatýǵa týra keldi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Taıynsha aýdany polıtsııa bóliminiń qyzmetkerleri ótken jyldyń jeltoqsan aıynda qoryqshylardyń aqparaty boıynsha Tselınnyı aýyly mańynda «VAZ-21212» avtomobılin jáne onyń qasynan atylǵan úsh sibir eligin tabady. Brakonerler oqıǵa ornynan qashyp ketedi. Jedel-izdestirý is-sharalary barysynda aýdannyń 35 jáne 41 jastaǵy turǵyny anyqtaldy.

Alaıda olar ózderiniń zańsyz ańshylyqqa qatysyn úzildi-kesildi moıyndamady. Máselen, er adamnyń bireýi kıimnen jáne kólikten tabylǵan qan men jún sıyrdiki degen. Atalǵan fakti boıynsha tergeý birneshe aıǵa sozyldy. Trasologııalyq, ballıstıkalyq jáne bıologııalyq, kóptegen saraptamalar taǵaıyndaldy. Olardyń bir bóligi Petropavlda, endi biri Qostanaıda jasaldy. Sondaı-aq, DNK analızin isteý úshin bıologııalyq materıaldyń úlgileri Nur-Sultanǵa jiberildi.

«Dál osy saraptama kúdiktilerdiń qylmysqa qatysyn dáleldedi. Quny aıtarlyqtaı qymbat DNK saraptamasynyń nátıjesi alǵash ret oblysta zańsyz ańshylyq faktisi boıynsha dáleldemeler bazasyna engizilip otyr. Іs boıynsha taǵaıyndalǵan jalpy saraptamalar quny 600 myń teńgedeı boldy. Bul somaǵa 2 mıllıon 700 myńnan astam teńgeni quraıtyn keltirilgen shyǵyndy qosý qajet. Aıta ketetini, kúdiktiler keltirilgen dálelderden bultara almaı, kinálaryn moıyndady jáne keltirilgen shyǵyndy da, protsessýaldyq shyǵyndardy da ótedi», - deıdi aýdandyq polıtsııa bóliminiń bastyǵy Nurlyjan Aqtanov.

Polıtseıdiń aıtýynsha, bul isti tergeýde krımınalısterdiń róli zor boldy. Sondaı-aq, aýdandyq polıtsııa bóliminiń bastyǵy jaýap alyp, bettestirýlerdi uıymdastyrǵan, tintý sııaqty dáleldemeler bazasyn qurýda asa mańyzdy jumystardy atqarǵan tergeýshilerdiń eńbegin de atap ótti.

Naýryz aıynda is materıaldary sotqa joldandy. Birer kún buryn SQO Polıtsııa departamenti bastyǵy Marat Tólebaevtyń atyna oblystyq orman sharýashylyǵy jáne janýarlar dúnıesiniń aýmaqtyq ınspektsııasynyń basshysy Erejep Janataevtan aýdandyq polıtseılerdiń jumysyna, ásirese tergeý bóliminiń qyzmetkeri Ádilhan Myrzataevqa alǵys bildiretini týraly hat kelip tústi. «Onyń muqııattylyǵy men tabandylyǵy kinálilerdi anyqtaýǵa, tergeýge núkte qoıýǵa kómektesti», - dep jazdy Erejep Janataev.