SQO-da brakonerler memleketke 2 mln teńge shyǵyn keltirdi

PETROPAVL. QazAqparat – Soltústik Qazaqstan oblysynda «Bıoresýrstardy qorǵaý» jedel-profılaktıkalyq is-sharasy ótip jatyr. Polıtseıler 15 kún boıy qoryqshylarmen jáne shekara qyzmetimen tyǵyz baılanysta jumys isteıdi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, qazirgi ýaqytta oblys aýmaǵynda ań aýlaýǵa tyıym salynǵan. Degenmen, muny elemeıtinder de bar. Oblys aýmaǵynda 1 sáýirden, operatsııa bastalǵaly 10 adam ákimshilik jaýapqa tartylǵan. Zańsyz ań aýlaýǵa shyqqandardyń biri qarýmen, endi biri tuzaq jáne qaqpanmen ustaldy.

«Ózen-kólderde balyq aýlaý úshin ruqsat qaǵazy bolýy qajet. Qyzyljar aýdanyndaǵy Uıaly kólinde eki er adam jalǵa berýshiden ruqsat qujatyn almastan zańsyz balyq aýlaǵan. Aýyl turǵyndaryna ákimshilik hattama toltyryldy, endi aıyppul tóleıdi», - deıdi SQO PD Jergilikti polıtsııa qyzmeti basqarmasy tabıǵatty qorǵaý polıtsııasy tobynyń bastyǵy Asqat Qojabaev.

Jalpy SQO-da jyl basynan QR ÁQtK 382, 187, 383-baby boıynsha 81 adam jaýapqa tartyldy. Zańsyz aǵash keskender ustalyp, sotqa 4 ákimshilik materıal tapsyryldy. Ekologııalyq qylmystar tirkelip, 9 qylmystyq is qozǵaldy. Kúdiktilerden 9 qarý, 5 sýyq qarý, 35 patron alyndy. Brakonerlerden jyl basynan kelgen shyǵyn - 2 mln teńgeden asady. Mamandardyń aıtýynsha, shyǵyn mólsheri budan da artyq bolýy múmkin, óıtkeni keı saraptamalar áli aıaqtalǵan joq.

Al «Bıoresýrstardy qorǵaý» jedel-profılaktıkalyq is-sharasy oblys aýmaǵynda 15 sáýir aıaqtalmaq.