SQO-da bir jylda baspana jaldaý aqysy 18 paıyzǵa qymbattady

PETROPAVL. KAZINFORM — Soltústik Qazaqstan oblysynda ınflıatsııa jyldyq esepteýmen alǵanda 9,3% jetti.

Ulttyq statıstıka bıýrosynyń SQO boıynsha departamentiniń málimetinshe, byltyrǵy jeltoqsanda 2023 jylǵy jeltoqsanmen salystyrǵanda, azyq-túlik taýarlaryna baǵa 6%, azyq-túlik emes taýarlarǵa — 10, aqyly qyzmetterge 13% ósti.

Bir jyl ishinde tuzdalmaǵan sary maı — 12%, balyq jáne teńiz ónimderi — 12, kúnbaǵys maıy — 12, kondıter ónimderi — 11, alkogolsiz sýsyndar — 9, et jáne qus eti — 5% qymbattaǵan. Alaıda jarmalar — 28%, qant — 1,5% arzandady. Jas kókónisterge baǵa 13,5% ósti, sonyń ishinde kartop pen qııar — 25%, qyzanaq — 24, pııaz 22% qymbatqa satylyp jatyr, biraq qyzylsha — 24%, sábiz 12% arzandaǵan.

Aýdıo jabdyqtary men fotoapparatýralar, aqparatty óńdeýge arnalǵan apparatýralar baǵasy — 43%, jeke bas tutynýyna arnalǵan taýarlar men prıborlar — 11, kıim jáne aıaq kıim — 10, farmatsevtıkalyq ónimder — 8,5, zergerlik buıymdar men saǵattar — 8, jýý jáne tazalaý quraldaryna — 8% artty. AI-95, AI-96 markaly benzın 8%, motor maıy 11% qymbattady.

Turǵyn úıdi jaldaý aqysy — 18%, ambýlatorlyq qyzmetter — 12,5, qoǵamdyq tamaqtandyrý qyzmetteri — 15,5% kóterildi. Kólik qyzmetteriniń quny 12% ósti, sonyń ishinde temir jol jolaýshylar kóligi qyzmetteri — 25% qymbattaǵan.

Buǵan deıin SQO-da bir jylda jylý tarıfi 33% qymbattaǵanyn jazǵan edik.