SQO-da azyq-túlik baǵasy bir jylda qalaı ózgerdi

PETROPAVL. KAZINFORM – Soltústik Qazaqstan oblysynda ınflıatsııa jyldyq esepteýmen alǵanda 9,6% jetti.

Ulttyq statıstıka bıýrosynyń SQO boıynsha departamentiniń málimetinshe, 2024 jylǵy qańtar men osy jylǵy qańtar aralyǵy esepke alynǵan. Ótken jylmen salystyrǵanda, azyq-túlik taýarlaryna baǵa – 6%, azyq-túlik emes taýarlarǵa – 10, aqyly qyzmetterge – 14% ósti. 

Bir jyl ishinde kúnbaǵys maıy – 14%, tuzdalmaǵan sary maı – 13, tuz – 12, balyq jáne teńiz ónimderi – 12, sıyr eti – 11, qus eti – 8% qymbattaǵan. 

Temeki ónimderiniń baǵasy 13% ósti. Jarmalar 30% qymbattasa, qant baǵasy 3,5% tómendedi. 
Jas kókónister 16% qymbatqa satylyp jatyr, sonyń ishinde kartop baǵasy – 42, qııarǵa – 36, pııaz – 28, qyzanaq – 17,5, oramjapyraq - 3% artty, al sábiz 14% arzandady.

Baǵalar fotoapparatýra, aqparatty óńdeýge arnalǵan jabdyqqa – 43%, motor maıyna – 17, kıim jáne aıaq kıimge – 10, jeke bas taýarlary men prıborlarǵa – 10, farmatsevtıkalyq ónimderge – 8, turmystyq prıborlarǵa – 2% artty. Kómir baǵasy da byltyrǵydan 15% ósken.

Bir jylda ystyq sýǵa tarıf 72,5% kóterildi. Turǵyn úı úshin tólenetin naqty jaldaý aqysy – 18%, sálemdeme jiberý – 17, ambýlatorlyq qyzmetter 13% ósti. Kólik qyzmetteriniń quny 11% kóterildi, sonyń ishinde áýe jolaýshylar kóliginiń quny – 23% qymbattaǵan. Salt-jora qyzmetteri 10% artty. Avtosaqtandyrý jáne notarıýs qyzmetterine baǵalar 6,5% kóterildi.

Buǵan deıin SQO-da múgedektigi bar balalarǵa arnalǵan ońaltý ortalyǵy ashylatyndyǵyn jazdyq.