SQO-da bir táýlikte 400-den astam baspana sý astynda qaldy

PETROPAVL. KAZINFORM – Soltústik Qazaqstan oblysynda sý basqan úılerdiń sany 2122-ge jetti. Tasqyn sý kirgen eldi mekenderdiń sany artyp keledi.

SQO Tótenshe jaǵdaılar departamenti baspasóz qyzmetiniń málimetinshe, ótken táýlikte 436 úıge sý kirgen. Eń kóp zardap shekken petropavldyqtar – 1105 úı sý astynda qaldy. Qyzyljar aýdanynda 867 baspana sýǵa ketti. 

Tasyǵan Esil ózeniniń sýy tómen qaraı ketip barady. Ótken táýlikte tasqyn sý Sokolovka, Vıshnevka, Olshanka, Bolshaıa malyshka eldi mekenderine kirdi. Mundaǵy turǵyndardy jedel túrde evakýatsııalaýǵa týra keldi. 

Jalpy qazirgi tańda qaýipsiz jerge kóshirilgen turǵyndardyń sany 10 345 adamǵa jetti. Onyń 3 myńy ótken táýlikte evakýatsııalandy. 10 myńǵa jýyq adam týǵan-týystaryn panalaǵan. 
Úı janýarlary da qaýipsiz jerge shyǵarylyp jatyr, olardyń jalpy sany – 4 myńǵa jýyq.

Sý tasqyny bastalǵaly óńirde jol ýchaskelerin 69 ret shaıdy. Qazirgi ýaqytta 17-sinde sý jatyr, onyń altaýy – respýblıkalyq mańyzy bar avtojoldar.

Petropavlǵa kire beristegi «Jezqazǵan-Petropavl» A-16 avtojolynyń 954 km-niń jarty shaqyrymyn sý basty. Tereńdigi – 75 sm. Qazir bul jerde tek júk kólikteri ǵana ótip jatyr.
«Chelıabi-Novosibir» M-51 halyqaralyq mańyzdaǵy avtojoldyń 527-529 km sý basty, uzyndyǵy 2 km, tereńdigi 210 sm asyp ketti.

Respýblıkalyq mańyzy bar R-49 Petropavl aınalma jolynyń 3-8 km, uzyndyǵy 1 km, tereńdigi metr jáne osy joldyń 11-14 km – uzyndyǵy jarty km, tereńdigi – 25 sm – sýda qaldy. 

SQO-da qaýipti jaǵdaı áli de saqtalǵan. Sergeev sý qoımasynda sý deńgeıi ótken táýlikte -29 sm-ge tústi, qazir shamamen 152 % tolǵan. 

Petropavl sý qoımasynyń deńgeıi kóterilip keledi. Ótken táýlikte 57 sm-ge kóterilip, 114,78% toldy.

Buǵan deıin eki táýlik sý berý toqtap qalǵan Petropavlda sýmen qamtýdyń qalpyna keltirilgenin aıtqan edik. 

Sondaı-aq, Petropavlda qutqarýshylar sý basqan aýmaqtan úı janýarlaryn shyǵaryp jatyr.