SQO-da bir aptada 9 adamdy kene shaqty
PETROPAVL. KAZINFORM – Soltústik Qazaqstan oblysynda sanıtar dárigerler kene shaǵý faktileriniń tirkelip jatqanyn eskertip, qarapaıym saqtyq sharalaryn turǵyndardyń esine saldy.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, tek bir aptada 9 adamdy, sonyń ishinde bir balany kene shaqqan. Zardap shekkender Petropavldyń jáne Aıyrtaý, Aqqaıyń, Taıynsha aýdandarynyń turǵyndary.
«Ótken jyldyń sáıkes kezeńimen salystyrǵanda kene shaǵý deregi 1,8 esege tómen. Byltyr osy kezde 17 adam dáriger kómegine júgindi. Sáýirdiń 16-sy men 18-i kúnderi Aıyrtaý aýdanyndaǵy Aıyrtaý jáne Lobanovo eldi mekenderinde dızensektsııalyq jumys júrgizildi», — deıdi departamenttiń baspasóz hatshysy Aınash Saǵandyqova.
Qaýipti jándik kene entsefalıti, kene súzegi, kene borrelıozy (Laım aýrýy), gemorragııalyq qyzba jáne t.b. sııaqty kóptegen juqpaly aýrýlardyń qozdyrǵyshy retinde belgili. Kene, ásirese mamyr-maýsym aıynda belsendi, sondyqtan tabıǵat aıasyna shyqqan kezde qansorǵyshtan qorǵanýdy umytpaǵan jón.
«Kene entsefalıtiniń vırýsy adamǵa negizinen ıksod keneler shaqqan kezde juǵady. Kene entsefalıti – ortalyq júıke júıesin zaqymdaıtyn jiti ınfektsııalyq aýrý. Aýrýdyń saldarynan múgedek bolyp, tipti sońy ólimge de ákelýi múmkin. Keneni ezgende nemese shaqqan jerdi tyrnaǵanda vırýs terige jaǵylyp, aýrý paıda bolýy múmkin. Kene entsefalıtiniń tabıǵı oshaǵynda bolǵan adamdar profılaktıkalyq ımmýndaýdan ótýi tıis. Kene shaǵýdan qorǵanýdyń taǵy bir joly – uzyn jeńdi, ashyq tústi kıim kııý. Óıtkeni qara kene ashyq tústi kıimde jaqsy kórinedi. Ádette kene adamǵa shópten nemese butadan jabysady. Keneler 1,5 metrden joǵary kóterilmeıdi, sondyqtan olar adamnyń aıaǵyna jabysady jáne sorýǵa yńǵaıly jer izdeıdi. Keneler baıaý jándikter, adamnyń kıimine nemese denesine túskende birden shaqpaıdy, jorǵalap oqshaýlaý oryn izdeıdi. Sondyqtan syrttan kelgennen keıin ústi-basty tolyq teksergen jón. Kremder, gelder jáne aerozolder túrindegi repellentterdi qoldanýǵa bolady», — deıdi Aınash Saǵandyqova.
