SQO-da bir aptada 3,6 myńnan astam adam JRVI-men dárigerge qaraldy

PETROPAVL. KAZINFORM – Soltústik Qazaqstan oblysynda jiti respıratorlyq vırýstyq ınfektsııa juqtyrǵandar sany artty. Tek bir aptada 3 655 adam dáriger kómegine júgingen. SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, bir aptada syrqattanǵandar sany 8%-ǵa artqan. JRVI juqtyrǵandardyń 2403-i – 14 jasqa deıingi bala. 

«Tumaýdy juqtyrýdyń sońǵy deregi bıyl naýryz aıynda tirkeldi. Epıdemıologııalyq maýsym aldynda ýaqtyly tumaýǵa qarsy profılaktıkalyq egý alýǵa keńes beremiz. Ol tumaýǵa qarsy ımmýnıtetti qalyptastyrady, tıimdiligi joǵary. Bıyl 60 myń adamǵa tegin ekpe jasalady. Olar - medıtsına qyzmetkerleri, medıtsınalyq uıymda dıspanserlik esepte turǵan balalar jáne balalar, sábıler úıleriniń tárbıelenýshileri, qarttar úıleriniń kontıngenti, epıdemıologııalyq kórsetkishter boıynsha 2-3 trımestrdegi júkti áıelder, sozylmaly aýrýlary bar adamdar, 65 jastan asqan adamdar. Bul turǵyndar tirkelgen jeri boıynsha emhanada vaktsınatsııadan tegin óte alady», - deıdi departamenttiń bas mamany Aınash Saǵandyqova. 

Tumaý, JRVI, koronavırýs aýrýlarynyń aldyn alý úshin sanıtar dárigerler úı-jaılardy únemi jeldetip otyrýǵa, qoldy óńdeý úshin antıseptıkalyq quraldardy paıdalanýǵa, aýrý adamdarmen baılanysty shekteýge, aýrý belgileri bar adamdarmen baılanysta bolǵan kezde betperdelerdi paıdalanýǵa, ýaqtyly medıtsınalyq kómekke júginýge keńes beredi. 

Buǵan deıin Jibek Joly telearnasyndaǵy «Taza qala» baǵdarlamasy elimizdiń soltúsik aýmaqtaryn aralaýdy bastaǵanyn jazǵan edik. Túsirilim toby Petropavl qalasynda bolyp, sý tasqynynan keıingi qazirgi tynys-tirshiligin kórestti.