SQO-da bıyl 36 eldi mekende sý máselesi sheshiledi

PETROPAVL. QazAqparat – Soltústik Qazaqstan oblysynda bıyl 22,8 myń turǵyny bar 36 eldi mekende taza sý máselesi sheshiledi, dep habarlaıdy QazAqparat tilshisi.

SQO ákiminiń orynbasary Sátjan Ablalıevtiń aıtýynsha, búginde oblystyń 415 aýyly – 65,3% ortalyqtandyrylǵan sý jelisine qosylǵan. Bul eldi mekenderde aýyl halqynyń 85% turady. Qalǵan 220 aýylda sý máselesi ótkir tur.

«41,7 myń adam turatyn 220 aýylda sý máselesi sheshilmegen. Al jalpy, qalalardy qosa eseptegende, oblys turǵyndarynyń sapaly aýyz sýmen qamtamasyz etilýi 92,2%.

Bıyl óńirdegi 36 eldi mekende sý máselesi sheshiledi. Olardyń ishinde Aıyrtaý aýdanynyń Aıyrtaý, Shalqar aýyldary, Qyzyljar aýdanynyń Chapaev, Peterfeld, Mamlıýt aýdanynyń Ledenev, Pokrovka, Bıke, Qyzylásker, Dýbrovnoe jáne basqalary bar. Jalpy bul aýyldarda 23 myńǵa jýyq adam turady. Jobalardy iske asyrý aıasynda 250 km sý jelisi jańǵyrtylady. 1 myńǵa jýyq úıge sýdy kirgizýge múmkindik týady», - deıdi Sátjan Ablalıev.

Bul maqsatqa 16,2 mlrd teńge jumsalmaq. Bul byltyrǵyǵa qaraǵanda 7,3 mlrd teńgege kóp.

Ótken jyly 8,9 mlrd teńgege 33,5 myń turǵyny bar 55 eldi mekende jumystar júrgizildi. 240 km jeli tartylyp, jańartyldy. Osy jumystardyń nátıjesinde 2 myńǵa jýyq úı sýǵa qosylý múmkindigine ıe boldy.