SQO-da bıoetanol óndiretin jeli iske qosyldy
SQO ákimi Qumar Aqsaqalov búgin Taıynsha aýdanynda bolyp, «Bio Operations» zaýytynda jańa jelini iske qosty.
Óńir basshysynyń baspasóz qyzmeti málim etkendeı, 8 jyl jumyssyz turǵan «Bio Operations» kásiporny tolyq jańǵyrtylyp, Frantsııanyń zamanaýı qondyrǵylary ornatyldy. Osylaısha, zaýytty qaıta iske qosýdyń sońǵy kezeńi aıaqtaldy.
Bıozaýytta buǵan deıin krahmal jáne glıýten shyǵaratyn eki jeli iske qosylǵan bolatyn. 450 adam turaqty jumysqa alyndy. Jalpy ınvestıtsııa kólemi 12 mlrd teńgeni quraıdy. Búginge deıin kompanııa 500 mln teńgeden astam salyq tólegen.
«Bıoetanol – bıdaıdy tereń jáne kúrdeli óndiristik protsester arqyly óńdeý nátıjesinde alynatyn sońǵy jáne negizgi ónim. Ol naryqta úlken suranysqa ıe.
Bıoetanoldy Pavlodar munaı óńdeý zaýytyna jetkizý týraly kelisimshart jasaldy.
Bastapqy kezeńde jylyna 20 myń tonna bıoetanol óndirilse, keıin birtindep 36 myń tonnaǵa deıin ulǵaıtý josparda bar. Osylaısha, biz bul ónimge degen eldiń qajettiligin tolyǵymen jabatyn bolamyz», - deıdi Qumar Aqsaqalov.
Zaýyttyń jyldyq óńdeý qýaty 300 myń tonnany quraıdy. Óndiriske jergilikti shıkizat qoldanylady.
«Bizde jylyna 360 myń tonna bıdaıdy óńdeıtin «Kazmıl» qospajem fabrıkasy bar. Taǵy «Baırek» qospajem zaýytynda qaıta jańartý jumystary júrgizilip jatyr. Munyń barlyǵy oblystaǵy astyqty qaıta óńdeý úlesin 20 % -ten 90 % -ke deıin ósirýge múmkindik beredi», - dep atap ótti óńir basshysy.
