SQO-da byltyr bir esirtki zerthanasy joıyldy, 771 kg esirtki aınalymnan alyndy

PETROPAVL. KAZINFORM – Soltústik Qazaqstan oblysynda ótken jyly polıtseıler esirtki qylmysyna qatysty 250-ge jýyq derekti tirkedi.

Onyń 10 – esirtkini asa iri kólemde saqtaýǵa, 132-si – jasyryp-taratýǵa, 3 – kontrabanda jáne 12-si esirtki zattaryn nasıhattaýǵa baılanysty. Bul týraly SQO polıtsııa departamenti bastyǵynyń orynbasary Asqar Muhametqalıev óńirlik kommýnıkatsııalar qyzmetiniń brıfınginde aıtty. 

- Bir jyl ishinde zańsyz aınalymnan 771,5 kg astam esirtki, sonyń ishinde 8,3 kg sıntetıkalyq esirtki zaty alyndy. Bul byltyrǵydan 30 kg artyq. Bir sıntetıkalyq esirtki zerthanasy joıyldy.

Sońǵy ýaqytta esirtkini áleýmettik jeli arqyly, anonımdi túrde satý beleń alǵan.

Qylmyskerler «Telegram», «Instagram», «Facebook» arqyly jáne ınternet dúkenderdiń mekenjaıyn graffıtı jazbalarmen qabyrǵada qaldyrý arqyly taratatyn bolǵan. Kúres júrgizilip jatyr. Byltyr 1754 habarlandyrý joıyldy, 151 silteme buǵattaldy, - deıdi Asqar Muhametqalıev. 

Esirtki zattaryn jarnamalaý boıynsha 12 qylmystyq is qozǵalǵan. Onyń úsheýi protsestik sheshim qabyldaý úshin sotqa jiberildi. 

Esterińizge salaıyq, Bıyl Petropavlda sıntetıkalyq esirtkini zertteıtin ortalyq ashylǵandyǵyn jazdyq. Buryn sıntetıkalyq esirtki ekenin rastaý úshin mamandar ony Kókshetaýǵa nemese Astanaǵa jiberýge májbúr bolǵan.

Sondaı-aq SQO-da esirtkimen ustalǵan áıel 11 jylǵa bas bostandyǵynan aıyrylǵanyn jazǵan edik.