SQO-da byltyr 5 myń náreste týyp, 6 myń adam qaıtys boldy

PETROPAVL. KAZINFORM — Soltústik Qazaqstan oblysynyń demografııalyq ahýaly jaıynda Ulttyq statıstıka bıýrosynyń departamenti málim etti.

Vedomstvonyń esebinshe, qazir óńirdegi halyq sany 522,2 myń adam, onyń 264 myń adam nemese 50,6% — aýylda turady.

— Byltyrǵy qańtar-jeltoqsan ishinde oblysta 5112 náreste týdy. Olardyń ishinde 2627-si ul bala jáne 2485-i — qyz bala. Oblys aýdandary arasynda bala týý kórsetkishi boıynsha birinshi orynda Ýálıhanov aýdany, odan keıin Aqjar jáne Jambyl aýdany alda keledi. Oblys boıynsha eń tómen týý kórsetkishi Aqqaıyń aýdanynda tirkelgen. Ǵ.Músirepov atyndaǵy aýdan men Mamlıýt aýdany ja kósh sońynda keledi, — deıdi departament ókilderi.

Ótken jyldyń qańtar-jeltoqsan aralyǵynda oblysta 6088 adam qaıtys boldy. Halyqtyń negizgi ólim sebepteri arasynda eń úlken úles — 20,6% júıke júıesiniń aýrýlaryna tıesili, 16,5% — qan aınalymy júıesiniń aýrýlary, 14,5% — tynys alý organdarynyń aýrýlary, 9,3% — as qorytý organdarynyń aýrýlary, 8,9% — obyr jáne 6,5% — jazataıym oqıǵalar, ýlaný men jaraqattaný alady.

Byltyr bir jyl ishinde 3027 neke tirkelse, azamattyq hal aktilerin tirkeý organdarynyń derekteri boıynsha 1496 jup ajyrasyp ketken. 

Buǵan deıin SQO-ǵa qonys aýdaryp, keıin kóship ketken turǵyn endi 5,2 mln teńgeni úsh aı ishinde qaıtaratynyn jazǵan edik.