SQO-da byltyr 150-ge jýyq kásipker azyq-túlik baǵasyn negizsiz ósirgen
PETROPAVL. KAZINFORM — Soltústik Qazaqstan oblysynda áleýmettik mańyzy bar azyq-túlik taýarlarynyń baǵasyn ósirgeni úshin byltyr 142 kásipkerge ákimshilik jaza taǵaıyndaldy.
Kásipkerlerdiń 123-ine eskertý jasalsa, 19-yna 1,6 mln teńge mólsherinde aıyppul salyndy.
Jaýapqa tartylǵandardyń ishinde iri, orta jáne shaǵyn kásipkerlik sýbektileri bar.
«AMANAT» partııasy SQO fılıaly janyndaǵy óńirlik damý keńesi men partııalyq baqylaý komıssııasynyń birlesken otyrysynda baǵa máselesi qaraldy. SQO boıynsha saýda jáne tutynýshylardyń quqyǵyn qorǵaý departamenti basshysynyń orynbasary Lázim Mııashevanyń sózine qaraǵanda, zańbuzýshylyqtar saýda oryndaryna tekseris júrgizý kezinde jáne elektrondyq shot-faktýralardy taldaý nátıjesinde anyqtalǵan.
Sonymen qatar, memlekettik mekemelerge áleýmettik mańyzy bar azyq-túlik taýarlaryn joǵary baǵamen jetkizý boıynsha memlekettik satyp alý sharttaryn buzý faktileri tirkeldi. Mundaı derekter aımaqtaǵy bilim berý mekemelerine ónim jetkizý kezinde anyqtaldy. Keıbir jaǵdaılarda ortasha naryqtyq baǵalar eskerilmegen, bul taýarlardyń qymbattaýyna alyp kelgen. Osy derekter boıynsha materıaldar tıisti organdarǵa, sonyń ishinde ekonomıkalyq tergeý departamenti men prokýratýraǵa joldandy.
Mamandardyń aıtýynsha, bıyldan bastap áleýmettik mańyzy bar azyq-túlik taýarlarynyń baǵasyn negizsiz ósirgeni úshin jazalaý sharalary kúsheıtildi.
— Baǵany baqylaýdy kúsheıtý maqsatynda Ákimshilik quqyq buzýshylyqtar týraly kodekske ózgerister engizildi. Atap aıtqanda, eskertý sharasy ákimshilik aıyppulmen almastyryldy. Jeke tulǵalar men shaǵyn kásipkerlik sýbektileri úshin — 5 AEK, orta kásipkerlik úshin — 35 AEK, al iri kásipkerlikke — 150 AEK kóleminde aıyppul salynady. Eger bir jyl ishinde qaıtadan zań buzýshylyq tirkelse, aıyppul mólsheri eki ese ósedi, — dedi Lázim Mııasheva.
Jıynda kartop baǵasy da nazardan tys qalmady. 2025 jyldyń qańtar aıynda onyń kóterme baǵasy 220-250 teńgege deıin jetken. Al úı mańyndaǵy dúkenderde bul ónim 340 teńgeden saýdalanǵan. Baǵanyń ósýine negizgi sebep — eksport kóleminiń artýy men ónim sapasynyń tómendeýi.
Baǵanyń kóterilýine qaramastan, azamattardan nemese qoǵamdyq uıymdardan departamentke shaǵym túsken joq. Tek «e-otinish» platformasy arqyly bir ǵana suraý túsken, onyń negizinde júrgizilgen tekserister nátıjesinde 4 saýda sýbektisi jaýapkershilikke tartyldy.
Buǵan deıin áleýmettik mańyzy bar azyq-túlik taýarlarynyń baǵasyn turaqtandyrý maqsatynda QR Saýda jáne ıntegratsııa mınıstrligi keshendi jumystar atqaryp jatqanyn jazǵan edik.