SQO-da bıyl sapasyz medıtsınalyq qyzmetke qatysty 100-ge jýyq shaǵym túsken

PETROPAVL. KAZINFORM – Petropavlda 28 myń turǵyny bar Jumysshy kentinde bir ǵana jekemenshik medıtsınalyq mekeme jumys isteıdi. Saldarynan halyq tıisti kómekti ala almaı otyr.

«AMANAT» partııasynyń Soltústik Qazaqstan oblystyq fılıalynda depýtattar mindetti áleýmettik medıtsınalyq saqtandyrý (MÁMS) aıasynda kórsetiletin medıtsınalyq qyzmetterdiń sapasy men qoljetimdiligin talqylady. Másele bar. Petropavldyń keı aýdandarynda qajetti maman ǵana emes, tipti emhana da jetispeıdi. 

Depýtat ıÝlııa Pronınanyń aıtýynsha, qala turǵyndary medıtsınalyq qyzmettiń sapasyna qatysty jıi shaǵymdanady. Adamdar tar beıindi mamandardyń jetispeýshiligin, qarapaıym analızderdi tapsyrýdyń, stomatologııalyq qyzmetterdi alýdyń nemese rentgenge túsýdiń múmkin emestigin aıtady. Áıtse de olar aı saıyn medıtsınalyq saqtandyrý qoryna aýdarymdar jasaıdy. Ásirese oblys ortalyǵynyń Jumysshy kentindegi jaǵdaı óte kúrdeli. 

- Jumysshy kentinde 28 myń adam turatynyna qaramastan, medıtsınalyq kómekti tek bir ǵana jeke mekeme – «MedicaLine» kórsetedi. Alaıda bul mekemege turǵyndardyń shaǵymy óte kóp. 

Biz halyqqa baǵdar berýimiz kerek. Jaǵdaı ýshyǵyp barady. Mysaly, ákimshilik qyzmettegi bir azamat «Men MÁMS jarnasyn tólemeımin, aqshamdy qaıtaryńdar» dedi. Keı medıtsına qyzmetkerleriniń ózi «Aqshamyzdy qaıtaryp alyp, qyzmetti basqa jerden alsaq bola ma?» dep suraıdy, - deıdi ıÝlııa Pronına.

SQO densaýlyq saqtaý basqarmasy basshysynyń orynbasary Mamadııar Baıǵulov másele baryn moıyndady. Onyń aıtýynsha, basty sebep – kadr tapshylyǵy. Problemany sheshý úshin óńirge kelgen jas dárigerlerge 8 mln teńgege deıin kóterme aqy beriledi. Sonymen qatar qajetti qural-jabdyqtar satyp alynyp jatyr. 

- Aqqaıyń aýdanynda bizde nevropatolog, kardıolog jetispeıdi. Biz qalada dúısenbiden jumaǵa deıin jumys isteıtin mamandarmen kelisimge keldik. Endi olar senbi kúni tańǵy saǵat 9.00-den 12.00-ge deıin, qajet bolǵan jaǵdaıda keshke deıin aýdanǵa baryp qabyldaý júrgizedi, - dedi Mamadııar Baıǵulov.

«Áleýmettik medıtsınalyq saqtandyrý qory» KEAQ oblystyq fılıalynyń dırektory Aınagúl Dáýletshınanyń aıtýynsha, osy jyldyń alǵashqy úsh aıynda ǵana patsıentterden 96 shaǵym túsken. Byltyr bir jylda 123 shaǵym túsken.

- 56 shaǵym keri qaıtaryldy. Eger syrqattarǵa ýaqytyly kómek kórsetilgende, bul shaǵymdar bolmas edi. Medıtsınalyq uıymnyń ózinde qajetti maman ne qural bolmasa, jetkizýshi qosalqy oryndaýshyny tartýǵa mindetti. Ol úshin qor bazasyna engen basqa medıtsınalyq uıymmen kelisimshart jasalyp, patsıent sol klınıkaǵa jiberilýi tıis. Eger mundaı kelisimshart bolmasa, patsıentti osy qyzmet túri boıynsha qordyń basqa jetkizýshisine jiberip, avtomatty túrde kelisim jasalýy kerek, - dedi Aınagúl Dáýletshına.

Depýtattar óz tarapynan usynystar men aıtylǵan máselelerdi jınap, olardy ýákiletti qurylymdarǵa joldaıtyn boldy. 

Buǵan deıin SQO-da 23 myńnan astam áıel pregravıdaldy daıyndyqtan ótetindigin jazǵan edik.