SQO-da bıyl esirtki saýdasymen ustalǵandardyń deni 25 jasqa deıingi jastar
PETROPAVL. KAZINFORM – Soltústik Qazaqstan oblysynda Astana qalasynyń 22 jastaǵy turǵyny esirtkimen qolǵa tústi.
SQO Polıtsııa departamenti baspasóz qyzmetiniń málimetinshe, jigittiń sıntetıkalyq esirtkini ınternet arqyly taratýǵa qatysy bar. Esirtki qylmysyna qarsy is-qımyl basqarmasynyń qyzmetkerleri ony Petropavlǵa kelgen kúni asa iri kólemdegi psıhotroptyq zattarmen ustaǵan. Tekserý kezinde jigitten 34 túıinshek mefedronnyń analogy anyqtaldy. Sonymen qatar jaldamaly páterinen taǵy 60 túıinshek tabyldy. Barlyǵy 104 gramm «sıntetıka» tárkilendi. Qazir tergeý júrgizilip jatyr.
Jedel ýákilderdiń aıtýynsha, esirtki saýdasyn uıymdastyrýshylar jastardy «ońaı tabyspen» qyzyqtyryp, azǵyrady. Alaıda olardyń áreketi kóbine alǵashqy kúnderde-aq áshkerelenip jatady.
Jyl basynan beri SQO-da esirtki satý kúdigimen 40-tan astam adam ustaldy, olardyń 36-sy – 25 jasqa deıingi jastar. Mamandar asa iri kólemde esirtki satý qylmysyna 7 jyldan 12 jylǵa deıin bas bostandyǵynan aıyrý jazasy barlyǵyn eske salady.
Buǵan deıin Qostanaı oblysynda 16 jastaǵy jasóspirim iri kólemde sıntetıkalyq esirtkimen ustalǵanyn jazǵan edik.