SQO-da bıyl balalardy profılaktıkalyq qarap-tekserýge 495 mln teńge bólindi
PETROPAVL. KAZINFORM – Soltústik Qazaqstan oblysynda bıyl balalardy aýdıologııalyq skrınıngten ótkizýge, 5 jasqa deıingi balalardy jáne mektepterde oqýshylardy profılaktıkalyq tekserýge 495 mln teńge bólindi.
«Áleýmettik medıtsınalyq saqtandyrý qory» KEAQ SQO boıynsha fılıalynyń dırektory Aınagúl Davletchınanyń aıtýynsha, qazirgi medıtsınada aýrýdyń aldyn alý mańyzdy. Elimizde balalardyń densaýlyǵyna erekshe nazar aýdarylyp, deni saý ult qalyptastyrýda qajetti is-sharalar qolǵa alynǵan.
«Birinshiden, otbasyn josparlaý boıynsha keshendi sharalar qarastyrylǵan. Ekinshiden, júkti áıelderdiń prenataldy skrınıngi 3 ret júrgiziledi, bul uryqtyń patologııasy men kemshilikterdi ýaqtyly anyqtaýǵa múmkindik beredi. Úshinshiden, perzenthanada jańa týǵan nárestege neonataldyq skrınıng júrgiziledi. Budan basqa, pedıatrııalyq kómek kórsetýdi uıymdastyrý standarttaryna sáıkes balalardyń aýrýshańdyǵynyń, múgedektiginiń jáne ólim-jitiminiń aldyn alý, tómendetý boıynsha jumys júrgiziledi», - deıdi Aınagúl Davletchına.
Balalar jeńildikti sanattardyń birine kirgendikten olar úshin 18 jasqa deıin mindetti áleýmettik medıtsınalyq saqtandyrý jarnalaryn memleket tóleıdi. Bıyl MÁMS júıesinde skrınıngter men profılaktıkalyq tekserýlerdi júrgizýge SQO-ǵa 495,4 mln teńge qarastyrylǵan, onyń ishinde aýdıologııalyq skrınıngke – 124 myń teńge, 5 jasqa deıingi balalardy profılaktıkalyq tekserýge – 30 562 myń teńge, mektep medıtsınasy aıasynda profılaktıkalyq tekserýge – 464 674 myń teńge bólindi.
«Jańa týǵan nárestelerge jáne 6 jasqa deıingi balalarǵa aýdıologııalyq skrınıng júrgiziledi. Bul balanyń estý qabiletiniń buzylýyn anyqtaýǵa múmkindik beretin standartty tekserý. Ol eki kezeńde júzege asyrylady – bala ómiriniń alǵashqy úsh kúninde tikeleı perzenthanada jáne emhanadaǵy balany damytý kabınetterinde belgili bir jastaǵy balalarǵa júrgiziledi. Ýchaskelik medbıke ata-analarmen baılanysyp, belgilengen merzimde skrınıngten ótýge shaqyrady.
Balalardyń estý qabiletiniń buzylýy anyqtalǵan jaǵdaıda múgedektikke ákeletin aýrýlardy ońaltý jáne aldyn alý boıynsha sharalar qabyldanady. Eger qulaq múkistigi nemese kereńdik qaýpi týyndasa, onda balany odan ári tereńdetip tekserý úshin sýrdologııalyq kabınetterge, sondaı-aq psıhologııalyq-medıtsınalyq-pedagogıkalyq konsýltatsııaǵa jiberedi», - deıdi fılıal basshysy.
Mamannyń aıtýynsha, mektepke deıingi, mektep jasyndaǵy balalar, sondaı-aq tehnıkalyq jáne kásiptik, orta bilimnen keıingi jáne joǵary bilim berý uıymdarynyń on segiz jasqa tolmaǵan oqýshylary profılaktıkalyq medıtsınalyq qarap-tekserýden ótedi. Ony bilim berý uıymyna barý arqyly emhana mamandary júrgizedi. Eger mektepke deıingi jastaǵy bala balabaqshaǵa barmasa, onda ol bekitilgen emhanasynda aldyn ala tekserýden ótedi.
Buǵan deıin bıyl áleýmettik tólemder mólsheri 18,3% artqanyn aıtqan edik.
