SQO-da bıyl 1,4 myń km respýblıkalyq jol dıagnostıkadan ótti
PETROPAVL. KAZINFORM – Soltústik Qazaqstan oblysynda respýblıkalyq mańyzy bar joldardyń 131 shaqyrymyna kúrdeli jóndeý qajet. Bul bıyl jol jelisine júrgizilgen aýqymdy dıagnostıka barysynda anyqtaldy.
«Jol aktıvteri sapasynyń ulttyq ortalyǵy» RMK SQO fılıaly baspasóz qyzmetiniń málimetinshe, óńirde respýblıkalyq mańyzy bar avtojoldardyń 1,4 myń shaqyrymy dıagnostıkalyq tekseristen ótti. Josparly jumys barysynda kepildi merzimi bitpegen ýchaskeler de tekserildi.
«Dıagnostıka júrgizýge jyljymaly jol zerthanasy qoldanyldy. Bul nysan zamanaýı arnaıy qondyrǵylarmen jaraqtandyrylǵan. Ár tekseris aldynda tehnıka kalıbrleýden ótedi. Dıagnostıka barysynda mamandar joldyń geometrııalyq parametrlerin, serpimdilik kórsetkishin, eńisterdi jáne jabynnyń basqa da aqaýlaryn esepke alady. Sondaı-aq IRI halyqaralyq ındeksi boıynsha jol tegistigi jáne kólik qozǵalysynyń qarqyndylyǵy tirkeledi. Barlyq derekter boıynsha GPS koordınattar beriledi, bul anyqtalǵan aqaýlar men jóndeýdi qajet etetin jerlerdiń ornyn dál anyqtaýǵa múmkindik beredi», - deıdi «Jol aktıvteri sapasynyń ulttyq ortalyǵy» RMK SQO fılıalynyń memlekettik esepke alý ınjeneri Erken Ábilmájinov.
Mamannyń aıtýynsha, dıagnostıka qorytyndysy shyǵarylyp, jóndeý jumysynyń túrleri men kólemi boıynsha usynymdary bar egjeı-tegjeıli esepter qalyptastyrylady. Keıin QR Indýstrııa jáne ınfraqurylymdyq damý mınıstrliginiń Avtomobıl joldary komıtetine jiberiledi. Olardyń negizinde «QazAvtoJol» UK» AQ jol jelisin jóndeý boıynsha jospar ázirleıdi.
«Bıyl 197,69 shaqyrym kepildik ýchaske jáne 1236 shaqyrym jol zertteldi. Nátıjesinde bizdiń fılıal respýblıkalyq joldyń 199,1 km ortasha jóndeý jáne 131,2 km kúrdeli jóndeý júrgizýdi usyndy. Mundaı dıagnostıka mańyzdy, bul - respýblıkalyq jol jelisiniń sapasyn arttyryp, qozǵalys qaýipsizdigin qamtamasyz etý úshin qajet», - deıdi Erken Ábilmájinov.
Buǵan deıin SQO-da «Ańsaǵan sábı» baǵdarlamasynyń kómegimen bıyl alǵashqy úshemniń dúnıege kelgenin jazǵan edik.
