SQO-da bıg-beg óndiretin kásiporyn tolyq qýatynda iske qosyldy
SQO ákimi Qumar Aqsaqalov óńir úshin tyń joba – bıg-beg shyǵaratyn kásiporynda bolyp, jumys barysyn kórdi. Birer jyl buryn iske qosylǵan joba búginde óndiris kólemin arttyrǵan.
«Biz qazir ekonomıkany túrli baǵytta damytyp jatyrmyz. Tek agrarlyq salany ǵana damytý jetkiliksiz. Jańa zaýyttar men fabrıkalardy ashý arqyly biz ekonomıkamyzdy ártaraptandyramyz.
Osyǵan deıin metal plastıkalyq buıymdar zaýyty men turmystyq hımııa fabrıkasy, termos vagondaryn shyǵarý óndirisi iske qosyldy. Jaqynda fanera fabrıkasy ashylady. «CLAAS» nemis kontserni men transformatorlar shyǵaratyn elektr zaýyty úshin bos turǵan ǵımarattar berildi», - deıdi óńir basshysy.
Jumsaq konteınerler óndirisi memlekettiń qoldaýymen júzege asyp otyr. Bıg-begke dándi daqyldardy, sýsymaly qurylys materıaldaryn jáne kendi saqtaýǵa bolady. Óndiris tolyq tsıkldi, úlken qaptarǵa qajet jip te osynda shyǵarylady.
Qazir óndiriste 170 soltústikqazaqstandyq jumys isteıdi. Bul jobaǵa 1,5 mlrd teńge ınvestıtsııa quıyldy. Kásiporyn jylyna 1,5 mıllıonǵa deıin bıg-beg shyǵarady.
«Bir jyl buryn bul ǵımarat bos bolatyn. Búginde toqý stanoktarynda suranysqa ıe taýarlar shyǵarylyp jatyr. Jalpy óńirde bos ǵımarattardy qalpyna keltirý jumystary qolǵa alyndy. Bos aýmaqtardyń jalpy aýdany 300 myń sharshy metrdi qurady. Búginde 109 myń sharshy metr jerde jańa óndiris oryndary iske qosyldy. Taǵy 92 myń sharshy metrde jańa jobalar jaqynda júzege asyrylmaq», - deıdi SQO ákimi Qumar Aqsaqalov.
