SQO-da bes jylda 100 mln aǵash otyrǵyzý mindeti tur

PETROPAVL. QazAqparat – Soltústik Qazaqstan oblysynda keshendi josparǵa saı bes jyl ishinde keminde 100 mln aǵash otyrǵyzylýy kerek. Bıyl 4,1 myń aýmaqqa kóshet egý josparlanǵan, dep habarlaıdy QazAqparat tilshisi.

SQO ormanshylarynyń esebinshe, óńirde 442,2 myń ga aýmaqty orman alyp jatyr. Tek byltyr orman alqaby 2,4 myń ga ulǵaıdy.

Bıyl da kóshet otyrǵyzý jalǵasyn tabady, biraq atqarylar jumys shamamen eki esege artpaq.

SQO boıynsha ekologııa departamentiniń málimetinshe, óńirde ormandy ulǵaıtýdyń 2021-2025 jyldarǵa arnalǵan keshendi jospary bar. Osy aralyqta orman qoryn 20 myń ga ulǵaıtyp, 100 mln aǵash otyrǵyzý mindeti tur.

Josparǵa saı 2021 jyly – 850 ga, 2022 jyly – 1700 ga, 2023 jyly – 4100 ga, 2024 jyly – 6350 ga, 2025 jyly 7000 ga kóshet egilýi tıis. 2021 jyly boljamdy kólem 102%, byltyr 111% artyǵymen oryndaldy. Nátıjesinde eki jylda 10 mln shamasynda aǵash otyrǵyzyldy.

2020 jyldyń sońynda aldaǵy bes jyldy qamtyǵan SQO eldi mekenderiniń mańynda jasyl beldeýler qurý jáne kógaldandyrý boıynsha óńirlik jospar jasalyp, bekitildi. Bul da nátıje berip, 2021 jyly 26,6 mln teńgege 115 myńǵa jýyq, 2022 jyly 30 mln teńgege 100 myńnan astam aǵash egildi.

Buǵan deıin SQO-da ekologııalyq qazandyqtardyń ornatyla bastaǵanyn aıtqan edik. Bıomassamen jaǵylatyn qazandyqtardyń eki jyldyń ishinde 50-i qoıyldy. Olar negizinen eldi mekenderdegi áleýmettik nysandardy – mektepterdi, mádenıet úılerin, ákimdik ǵımarattaryn jylytady.