SQO-da balalar úıiniń tárbıeshisi túrli materıaldan músinder jasaıdy
PETROPAVL. KAZINFORM – Sýretshi, músinshi, balalar teatr stýdııasynyń qoıýshy-rejısseri. Desek te, Soltústik Qazaqstan oblysy Aıyrtaý aýdanynyń turǵyny Aleksandr Antonovtyń negizgi qyzmeti – tárbıeshi. Balalardy qoldaý ortalyǵynda eńbek etetin ustaz bar bilgenin oqýshylaryna úıretip júr.
- Ózińizdi tanystyryp ketińizshi…
- Aıyrtaý aýdany qazirgi Syrymbet aýylynda dúnıege kelgenmin. Qazir jasym 60-ta. Kishkentaıymnan sýretti jaqsy saldym, sol sebepti bolashaǵymdy da shyǵarmashylyqpen baılanystyrǵym keldi. Alaıda áke-sheshem, «eń aldymen mańyzdy mamandyq alyp shyq, keıin qaıda oqımyn deseń de óz erkiń» dep, ruqsat bermedi. Osylaısha Qorǵan mashına jasaý ınstıtýtyna, tanki qurastyrýshy mamandyǵyna oqýǵa tústim. Biraq úsh kýrsyn oqyp tastap kettim. Keıin áskerge bardym.
Toqsanynshy jyldar ómirimdi kúrt ózgertti. Joqshylyq, eńbekaqyny ýaqtyly tólemeıdi. Anam jergilikti balalar úıinde 42 jyl eńbek etti. Birde meni balalar úıine jumysqa shaqyrdy, óıtkeni mekemede eńbekaqyny úzbeı beretin. Kópke deıin kelispedim, óıtkeni anam sonda jumys istegendikten balalar úıiniń ne ekenin jaqsy bilem.
Joqshylyq jeńdi. Anam bir jyl jumys iste, keıin saýdańa bararsyń degen edi. Balalar úıinde eńbek etkenime bıyl 26 jyl bolypty.
- Sizge qaısy janyńyzǵa jaqyn – ustazdyq pe, álde shyǵarmashylyq pa?
- Ol ekeýin bóle almaımyn. Qolynan eshteńe kelmeıtin adam ustaz bola almaıdy. Durys tárbıe bolashaqtyń negizi. Sol sebepti balabaqsha tárbıeshilerinde eń joǵary eńbekaqy bolýy tıis dep esepteımin.
- Shyǵarmashylyǵyńyz neden bastaldy?
- Shynymdy aıtsam, esimde joq. Maǵan bári qyzyq. Balalarmen birge men de únemi bilimge qushtarmyn.
- Qolyńyzdan kelmeıtin dúnıe bar ma?
- Bir nárseni bastasam, sony aıaqtaǵansha deıin toqtaı almaımyn. Al, jalpy maqtanǵanym emes, úıdiń jobasyn syzyp, ózim tolyq salyp shyǵa alamyn. Kóligim bar, Aýdı A8, sony ózim jóndeı beremin.
- Qandaı materıalmen jumys istegen unaıdy?
- Buryn kóp sýret salatynmyn. Qardan túrli pishinder isteımin. Jańadan kelgen dırektor meniń osy dúnıelerimdi kórip, «betonmen jumys isteı alasyń ba» dedi. Maǵan jańa materıaldy ıgerý qyzyq boldy, «istep kóreıin» dedim. Nátıjesinde balalar úıiniń aldynda «Altyn adam», jylqylar, basqa da músinder paıda boldy. Keıin aýyldyq okrýgter úshin túrli músinder jasadym.
Áıelim ınternette gırlıandamen bezendirilgen jańajyldyq músinderdi kórip, istep bershi dep ótindi. Buǵyny shanasymen jáne Aıaz atany, mine jaqynda ǵana istep boldym. Bul tehnıkamen de jumys isteý qyzyq boldy. Ony jasaýǵa «rosa» atty gırlıandany qoldandym. Shamamen 500 metr uzyndyǵy. Ol symnan jasalǵandyqtan tez úziledi, abaılamasań barlyq jumysyń esh ketýi múmkin.
- Qardan músin jasaý qanshalyqty qıyn?
- Barlyǵy tájirıbemen keledi ǵoı. Mundaı músinder sýly qardan jasalynady. Betonmen tehnologııasy bir. Buryn rezeńke qolǵaptar bolmaıtyn. Sondyqtan aıazda jalań qol isteýge týra keletin. Eki-úsh mınýt jumys isteımin de, qolymdy ystyq sýǵa malyp jylytyp alamyn. Al qalǵany qıyn emes.
Bıyl da balalar úshin mekememizdiń janyna Aıaz ata men Aqshaqardyń qardan músinin jasap qoıdym. Onyń qasyna aqqala men chebýrashkany balalardyń ótinishteri boıynsha ornalastyrdym.
- Balalar úıindegi «Volshebnaıa rampa» teatraldyq stýdııasy sizdiń jetekshiligińizben birneshe spektakl qoıǵan eken. Bul stýdııa qashannan jumys isteıdi?
- Meniń mindetim balalarǵa patrıottyq tárbıe berý. Jeńis kúnine daıyndyq barysynda nege soǵys jyldaryndaǵy ánder men óleńderdi qoıylym arqyly kórsetpeske degen oı keldi. Keıin jańajyldyq ǵajaıypqa toly spektakldi qoıdyq. Balalardyń qyzyǵýshylyǵy joǵary bolǵandyqtan bul jumysty toqtatpadym. Eń úlken spektakldi «otbasymmen» qoıdyq. Meniń otbasymda 24 adam bar, osy balalarymmen «Eshkim de, eshteńe de umytylmaıdy» atty qoıylymdy sahnaladyq, oǵan maıdannan kelgen hattar negizge alyndy. Spektakl barysynda óte kóp óleń oqyldy, ánder aıtyldy.
Qazirgi balalar basqasha, qıyndyqtan qashyp turady. Ári balalar eseıip, biri kelip, biri ketip jatady, ıaǵnı óz qıyndyqtary bar. Sondyqtan, spektaklderimiz burynǵydaı jıi shyqpaıdy.
- Birneshe spektakldi kórdim, balalar qyzyǵýshylyqpen oınady. Olardyń arasynda keıin bolashaǵyn akterlikpen, ónermen baılanystyrǵandar bar ma?
- Nına Kravtsova degen qyzymyz boldy, mýzykaǵa jaqyn, óte ıkemi bar edi. Ózdiginen kúısandyqty, gıtarany meńgerip aldy, daryny bar. Qazir ol Amerıkada turady. Hat-habar alysyp turamyz. Biraq ónerde joly bolmady. Taǵy bir oqýshym boldy, ol da talantty, biraq keıde ol jetkiliksiz, belgili bir nátıjege qol jetkizý úshin jumys isteý kerek, qıyndyqtan qashpaý qajet. Biz ony reseılik «Sen – sýper» baǵdarlamasyna da jibermek boldyq. Jarty jylǵa jýyq daıyndadyq, biraq jeme-jemge kelgende qorqyp, barmaı qoıdy.
- Munyń bárin ne úshin isteısiz?
- Meniń eki ulymnyń múgedektigi bar. Ókinishke oraı, bar bilgenimdi men olarǵa bere almaımyn. Sondyqtan da, oqýshylarymdy úıretkim keledi. Bul ómirde óz joldaryn taýyp, otbasyn quryp, adal eńbek etse, umytpaı, kelip, jańalyqtarymen bólisse – ustaz úshin odan artyq baqyt joq.
Buǵan deıin jańajyldyq erteńgilikterge 20 jylǵa jýyq patrıottyq kıim tigip júrgen SQO turǵyny jaıynda jazǵan edik.