SQO-da azyq-túlik baǵasyn negizsiz kótergender jazalandy

PETROPAVL. KAZINFORM – Soltústik Qazaqstan oblysynda keı mektepter men balabaqshalarda áleýmettik mańyzy bar azyq-túlikter joǵary baǵaǵa alynyp kelgen.

Bul - SQO boıynsha ekonomıkalyq tergep-tekserý departamenti mamandary sala boıynsha tekseris júrgizgende belgili boldy. 

«Óńirdegi bilim berý mekemeleriniń áleýmettik mańyzy bar azyq-túlik ónimderin joǵary baǵamen satyp alý faktileri anyqtaldy. Qabyldanǵan sharalardyń nátıjesinde satyp alý quny ortasha respýblıkalyq kórsetkishke deıin tómendedi. 454 mekteptiń shyǵyny azaıdy, 458 mektepke deıingi mekemede 17 myń ata-ananyń aqshasy únemdeldi», - deıdi departamenttiń basshysy Baqytjan Abýlhaırov.

Departamenttiń bastamasymen belgilengen taýarlyq ústemeden joǵary baǵa qoıǵan 15 kásipkerlik sýbektisi ákimshilik jaýapkershilikke tartyldy. Nátıjesinde un, kúrish, sary maı, ósimdik maıy, tuz, qaraqumyq, aıran, taýyq jumyrtqasynyń ortasha naryqtyq baǵasy 17%-ten 30% tómendetildi.

Budan bólek ınfraqurylymdy damytýǵa bólingen bıýdjet qarajatyn maqsatsyz paıdalaný faktilerin anyqtaý maqsatynda departament Ulttyq jobalardy iske asyrýǵa taldaý júrgizdi, oǵan oblys boıynsha 27 mlrd teńge bólingen. Nátıjesinde 1,3 mlrd teńge negizsiz shyǵyn dep eseptelip, jelge ushýyna jol berilmedi.

Buǵan deıin rıptovalıýta aıyrbastaý pýnktin zańsyz quryp, tabys taýyp kelgenderdiń isin áshkerelegenin jazǵan edik.