SQO-da áıeldiń kámelet jasyna tolmaǵan qyzyn bótelkelesteri zorlaǵan
PETROPAVL. KAZINFORM – Soltústik Qazaqstan oblysy Taıynsha aýdanynda kámelet jasyna tolmaǵan qyzdy óz úıinde birneshe er adam zorlaǵan.
Bul qylmys jaıynda búgin SQO prokýrorlary vedomstvoaralyq keńeste aıtty. Oqıǵa 18 qańtar kúni bolǵan. Áıelge spırttik ishimdik ishýge kelgen «dostary» keıin onyń qyzyn zorlaǵan. Prokýrorlardyń pikirinshe, bul qylmystyń aldyn alýǵa bolar edi. Biraq kámelet jasyna tolmaǵandarmen jumys jónindegi komıssııa óz mindetine júrdim-bardym qaraǵan.
«Osy qylmysqa qatysty sotqa deıingi tergeý júrip jatyr. Osy oqıǵanyń aldynda bir aı buryn mektep aýdandyq ákimdik janyndaǵy kámelet jasyna tolmaǵandar jónindegi komıssııaǵa ishimdikke salynǵan áıeldi ata-ana quqyǵynan aıyrý jóninde ótinishhat joldaǵan. Biraq komıssııa ony der kezinde qaramaı, tek oqıǵa bolǵannan keıin qańtar aıynda ǵana qaraǵan», - deıdi oblys prokýrorynyń aǵa kómekshisi Vıktor Naıda.
Al Jambyl aýdanynda bir úıdiń eki balasy eki jyl boıy mektepke múlde barmaǵan. Áke-sheshesi birneshe ret eskertilgenimen, másele sheshimin tappady. Sondyqtan qazir olarǵa qatysty ústerinen is qozǵalyp, ata-ana quqyǵynan aıyrý jazasy qoldanylmaq.
