SQO-da áıel jetim qyzdy jezókshelikke tartyp, járdemaqysyn tartyp alǵan

Soltústik Qazaqstan oblysynyń turǵyny QR Qylmystyq kodeksiniń úsh baby - prıton uıymdastyrý, alaıaqtyq jáne adam saýdasy boıynsha sottaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 2022 jyldyń mamyr aıynda 39 jastaǵy Petropavl turǵyny jaldamaly páterde prıton uıymdastyrǵan.

WhatsApp arqyly massaj jasaýshynyń jumysyn ýáde etip, Aqmola oblysynan kelgen 18 jastaǵy jetim qyzdy aldaý arqyly jezókshelikke tartqan.

Boıjetken birneshe ret ıntımdik qyzmet kórsetýden qashyp, kolledjde oqýyn jalǵastyrýǵa tyrysqan, biraq áıel oǵan kúsh qoldanyp, moraldyq qysym kórsetip, keri qaıtaryp otyrǵan.

Klıentterden túsken barlyq aqshany óz qaltasyna basqan.

Sondaı-aq asyraýshysynan aıyrylýyna baılanysty qyzǵa berilgen 2,7 mln teńge shamasyndaǵy járdemaqyny, 150 myń teńge mólsherinde jınalǵan shákirtaqyny da ózine aýdaryp alǵan.

«Osyndaı qylmystar uzaq ýaqyt boıy jasyryn túrde jasalýyna zardap shegiýshilerdiń quzyrly organdarǵa júginbeýi sebep. Máselen Aqmola oblysynyń 18 jastaǵy turǵynyna qatysty birneshe ret quqyqqa qaıshy áreketter jasalǵan, biraq ol múldem polıtsııaǵa júginbegen. Bul másele basqa qylmysty ashý barysynda anyqtaldy», - deıdi SQO PD uıymdasqan qylmysqa qarsy kúres basqarmasynyń bastyǵy Jandos Basybaev.

Ákki áıeldi polıtsııanyń uıymdasqan qylmysqa qarsy kúres basqarmasynyń qyzmetkerleri bıyl kóktemde qolǵa túsirdi.

Ol Petropavlda sypyryp-jýýshynyń jumysyn izdep júrgen áıelmen tanysyp, ony da aldap, Aqmola oblysyna jynystyq qyzmet kórsetý úshin 250 myń teńgege satyp jibermek bolǵan. Alaıda bul áreketi iske aspady.

Tamyz aıynda sot oǵan prıton uıymdastyrý, adam saýdasy jáne alaıaqtyq jasaǵany úshin úkim shyǵardy. Áıel 6 jylǵa bas bostandyǵynan aıyryldy.