SQO-da aýyl turǵyny sibir eligin atyp alǵan

PETROPAVL. QazAqparat – Soltústik Qazaqstan oblysynyń tabıǵatty qorǵaý polıtseıleri reıd barysynda aýyl turǵynynyń úıiniń mańynan atyp alynǵan sibir eliginiń etin tapty, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, tabıǵatty qorǵaý polıtseıleri men jergilikti tártip saqshylary Jambyl aýdanynda reıd ótkizdi. Іs-shara barysynda aýyldardyń birinde úı janynan soıylǵan sibir eligin tapqan. Ańnyń terisinde oq izderi bolǵan.

Zańsyz ań aýlady degen kúdikpen aýdannyń 46 jastaǵy turǵyny ustaldy. Eliktiń eti, qarda júretin «Rys» transporty , «IJ-43E» jáne «TOZ-87» ańshylyq myltyqtary, oq-dári jáne ań aýlaýǵa qajet basqa da zattar tárkilendi. Kúdiktiniń janynda aýyldyń eki turǵyny bolǵan. Qazirgi ýaqytta olardyń qylmysqa qatystylyǵy jáne istiń mán-jaıy anyqtalyp jatyr. Ustalǵan er adamǵa mindetti túrde kelý bultartpaý sharasy qoldanyldy.

«Tabıǵatty qorǵaý polıtsııasy orman jáne ańshylyq sharýashylyqtardyń ókilderimen birge únemi reıdter ótkizip turady. Jyl basynan balyq aýlaý tártibin buzýdyń 37 deregi jáne ań aýlaý tártibin buzýdyń 122 faktisi anyqtaldy. Polıtsııanyń negizgi baǵyttarynyń biri - tabıǵat resýrstaryn brakonerlik jolmen paıdalanýǵa qarsy turý», - deıdi SQO PD JPQ basqarmasynyń tabıǵatty qorǵaý polıtsııasy tobynyń aǵa ınspektory Ashat Qojabaev.

Bul – zańsyz ań atýǵa qatysty SQO-daǵy bıyldyqqa alǵashqy derek.