SQO-da aýyl turǵyny mamonttyń súıekterin tapty
PETROPAVL. KAZINFORM — Soltústik Qazaqstan oblysy Aryqbalyq aýylynyń turǵyny Aleksandr Kolesnıchenko erekshe jádigerdi balyq aýlaýǵa barǵanda tapqan.
— Aýyldyń mańynda ózen bar, ol ózen tarmaqtanyp ketedi. Qarasam jar qulaǵan eken, sý shaıǵan ǵoı. Sol qulaǵan jerden aǵarǵan zatty kórdim. Qazyp edim, súıek eken.
Biraq, ondaı súıek men biletin esh janýarda joq, Óte úlken boldy. Ári qaraı qazyp, bas súıekti shyǵardym. Ózimmen kúrek te almap edim, jeri qumdy eken, sýsyp, qolmen ońaı qazyldy. Keıin janýardyń qabyrǵalary jáne joǵary jaq súıegi tabyldy, — deıdi aýyl turǵyny.
Aleksandr Kolesnıchenko kóne súıekter qandaı janýarǵa tán ekenin bilý úshin fotoǵa túsirip, ınternetten qaraıdy.
— Shynynda da, bul mamonttyń joǵary jaq súıegi eken. Mundaı iri bolady dep oılamappyn.
Azýy da topyraqtan shyǵyp turdy, biraq ol óte nashar saqtalǵan eken, qum bolyp úgitilip jatyr.
Keshe baryp qarap edim, jar taǵy da qulapty. Menińshe, ol jerde mamandar qazba jumysyn júrgizýi kerek, — deıdi Aleksandr Kolesnıchenko.
Endi ol tapqan jádigerlerdi jergilikti mýzeı «Botaı» memlekettik tarıhı-mádenı mýzeı-qoryǵyna tabys etpek.
Mekeme dırektory Sabına Ámirovanyń aıtýynsha, Aıyrtaý óńirinde ejelgi janýarlardyń súıekteri jıi kezdesedi. Sońǵy ret turǵyndar mamont tóliniń qaldyǵyn jáne múıiztumsyq súıegin ákelip tapsyrǵan eken.
Esterińizge salaıyq, buǵan deıin SQO-da alyp mamonttyń súıegi tabylǵanyn jazǵan edik.
Aqmola oblysynda da mamont qaldyqtary tabyldy.