SQO-da aýyl ákimi bos ýaqytynda keste tigip, temirden qarý-jaraq soǵady
PETROPAVL. KAZINFORM — Soltústik Qazaqstan oblysy Maǵjan Jumabaev aýdany Sovetskoe eldi mekeniniń turǵyny Valerıı Forsh — segiz qyrly, bir syrly kópke úlgi bolyp júrgen azamat. Er adam Altyn dán aýyl okrýginiń ákimi, ári jergilikti mektepte balalarǵa sabaq beredi. Qoly qalt etkende qolónermen aınalysyp, túrli buıymdar jasaıdy. Onyń monshaqty paıdalanyp, erekshe tásilmen jasaǵan Abaıdyń portreti halyqaralyq baıqaýda bas júldeni jeńip alǵan. Valerıı ıAkovlevıch jaqynda Qazaqstan Respýblıkasy Memlekettik qyzmet isteri agenttigi oblystyq departamenti uıymdastyrǵan «Memlekettik qyzmettegi daryndar» baıqaýynyń jeńimpazy atandy. Sheberdi tilshimiz áńgimege tartty.
— Siz mektepte kórkem eńbek páni muǵalimisiz jáne aýyldyq okrýgte ákim bolyp eńbek etip jatyrsyz. Buǵan ruqsat berilgen be?
— Negizi meniń eńbek jolym qyzyq, aldymen mektepte muǵalim bolyp eńbek ettim, keıin JShS-de prorab bolyp jumys istedim. 2015 jyly mektepke qaıtyp keldim. Al 2020 jyly jergilikti turǵyn retinde aýyldyq okrýgtiń ákimi bolýdy usyndy. Biraz nárse úırenip qalǵan balalarymdy tastaǵym kelmedi, ári zań boıynsha memlekettik qyzmetshige 8 saǵat ustazdyq qyzmetpen aınalysýǵa bolady eken, sondyqtan eki jumysty qatar alyp kele jatyrmyn.
— Siz shyǵarmashylyq adamysyz, bul memlekettik qyzmette kómektese me?
— Shyǵarmashylyq — bul erekshe oılaý qabileti ǵoı. Sondyqtan qoıylǵan mindetterdi oryndaýda erekshe sheshimder qoldanylady. Qurylys boıynsha kóp jylǵy tájirıbemniń de paıdasy tıip jatyr.
— Shyǵarmashylyqqa qalaı keldińiz, neden bastadyńyz?
— Men kishkentaıymnan sýret salamyn. Sýretten alǵashqy ustazdarym — anam men ájem. Olardyń kestelerine qarap otyryp, qııalǵa erik beretinmin. Mektepte súıikti pánim sýret sabaǵy bolatyn. Úıde aǵashty oıyp, túrli zat jasadym, tigin tigetinmin. Mektepte de qabyrǵa gazetterin shyǵarý meniń moınymda boldy. Sondyqtan osy salany tańdap, Semeı pedagogıkalyq ınstıtýtyna, kórkem-grafıkalyq fakýltetine oqýǵa tústim.
Maǵan bári qyzyq, bilmegenimdi úırenýge tyrysamyn. Maıly boıaýmen sýret salamyn, aǵashtan túrli zattar jasaımyn, úı jıhazyn da ózim isteı beremin. Metaldan batyrlardyń saýyt-saımanyn, qarý-jaraq isteımin. Kıim-keshek tigip, kesteleı de alamyn. Plastık bótelkelerdi de kádege jaratamyn. Úıimdi bastan-aıaq ózim salyp shyqtym.
— Eń qıyn jáne ýaqytty kóp alǵan jumysyńyz jaıynda aıtyp berińizshi…
— Ol — monshaqpen bezendirilgen portret. Alǵashqysy — Maǵjan Jumabaevtyń portreti, ony oqýshylarymmen birge jasadyq, qazir jergilikti ýnıversıtette ilinip tur. Ekinshisi — Abaıdyń mereıtoıyna arnaǵan eńbegim. Onymen halyqaralyq baıqaýda jeńiske jettim. Bir jyldan astam ýaqyt ketti, portretti jasaýǵa 144 myń monshaqty paıdalandym, mozaıka ádisimen jasalǵan. Tústerin keltirip otyryp, monshaqpen sýretin saldym deýge bolady. Ár bıserdi jelimmen bekittim, bul óte uzaq ýaqytty jáne energııany alady. Biraq nátıjesi soǵan turarlyq. Meniń maqtanyshym. Úıimde, tórde ilinip tur. Osydan keıin kóptegen adam maǵan tapsyrys bermekshi boldy, biraq, memlekettik qyzmet maǵan shyǵarmashylyqpen qalaǵanymsha aınalysýǵa múmkindik bermeıdi.
— Túrli tehnıkany meńgergen ekensiz, biraq sonyń ishinde kóńilińiz jatatyny qaısy?
— Jalpy maǵan aǵashpen jumys istegen unaıdy. Zattardyń ishinde tarıhı qarý-jaraqpen aınalysqandy unatamyn. Bul oqýshylaryma da qyzyq. Máselen, qylysh jasap otyryp, batyrlar jaıynda sóılesemiz, munyń ózi tárbıe.
— Tapsyryspen jumys isteısiz be?
— Buryn jumsaq jıhaz jasaýǵa tapsyrys alatynmyn. Germanııanyń katalogy boldy, soǵan qarap isteıtinmin, keıbiri ózgertip ber dep ákeletin. Maǵjan Jumabaevtyń mereıtoıyna tórt túrli portretke tapsyrys boldy. Qazir ýaqytym joq, úlgermegendikten aınalyspaımyn. Al eldi mekende meniń qolymnan shyqqan dúnıeler kóp, aýyldaǵy ár shańyraqta men jasaǵan dúnıe bar. Jergilikti JShS-ge monsha salyp berdim. Erekshe dızaınmen salǵan dámhana jumys istep tur.
— Oqýshylaryńyzdyń arasynda jolyńyzdy qýǵan izbasaryńyz bar ma?
— Iıa, bir oqýshym qazir Petropavlda jıhaz fabrıkasyn ashyp jumys istep jatyr. Jýyrda kelip, bergen bilimim úshin rahmet aıtyp ketti. Eki qyzym mektepten keıin ýnıversıtetke dızaıner mamandyǵy boıynsha túsip, qazir jumys istep jatyr. Oqýshylarymnyń jasaǵan jumystary túrli baıqaýlarda júldeli oryn alady. Aýdanymyzda túrli tehnıkamen jasalǵan 90 jumys qoıylǵan kórme de uıymdastyrdyq.
— Aýyldyq okrýgte ákim bolyp eńbek etip jatyrsyz. Sizdiń merzimińiz bitýge taıaý eken. Tórt jyldyń ishinde ákim retinde qandaı máselelerdi sheshtińiz?
— Aýyldyq okrýgte 5 km jolǵa asfalt tóseldi. Prıdorojnoe, Sovetskoe eldi mekenderiniń 20 km jolyna qıyrshyq tas tóseldi. Prıdorojnoe eldi mekeni 100% jaryqtandyryldy. Mádenıet úıi kúrdeli jóndelip, iske qosyldy, onda qazir sport, trenajer zaldary bar. Jergilikti sharýashylyq qajetti kerek-jaraqty alyp berip, qazir onda úsh top jattyǵady. Sovetskoe eldi mekeninde sý jelisi tolyq jańartyldy. Mundaǵy úılerdiń 95% sý úıge kirgizilgen. Abattandyrý jumysy turaqty túrde júrgiziledi. Sporttyq jarystardan da qalmaımyz, osy tórt jyldyń ishinde 20 shaqty kýbokty ıelenippiz.
Osy aýylda týdym, oqý bitirgennen keıin osynda tapjylmastan jumys istep jatyrmyn. Qonys aýdarýǵa múmkindikter boldy, týǵan-týysqanym qazir Germanııada turyp jatyr. Biraq men únemi ultym nemis bolsa da, janym qazaq dep aıtamyn. Týǵan elimnen eshqaıda ketpeımin.
