SQO-da aýdan ákimderi saılaýynyń qorytyndysy shyqty
Soltústik Qazaqstan oblysy aýmaqtyq saılaý komıssııasy 5 qarashada Esil, Mamlıýt, Tımırıazev aýdandary ákimderin saılaý qorytyndysyn shyǵardy, dep habarlaıdy Kazinform.
SQO aýmaqtyq saılaý komıssııasynyń málimetinshe, Esil aýdany boıynsha eki kandıdat bolsa, Mereke Muhamedııarov úshin saılaýshylardyń 8419 daýys berdi. Onyń qarsylasy Serik Shaımergenov 1630 daýys jınady. «Barlyǵyna qarsy» belgisi bar bıýlletender sany 724 boldy.
Mamlıýt aýdany boıynsha Elena Stepanenko 6817 daýys jınady. Abzal Ismanovqa saılaýshylardyń 604-i daýys berdi. Meıirhan Jumyqov 428 daýys jınady. «Barlyǵyna qarsy» belgisi bar bıýlletender sany – 416.
Tımırıazev aýdany boıynsha Erlan Jarovqa 3536 saılaýshy daýys berdi. Qaırat Jaǵyparov 358 daýys jınasa, Talǵat Eslámov úshin 338 saılaýshy daýys berdi. «Barlyǵyna qarsy» belgisi bar bıýlletender sany 181 boldy.
Saılaý qorytyndysy boıynsha Esil aýdanynyń ákimi bolyp Mereke Muhamedııarov saılandy, 1962 jyly týǵan, buǵan deıin Esil aýdany ákiminiń orynbasary boldy.
Mamlıýt aýdanynyń ákimi bolyp Elena Stepanenko saılandy. Ol 1972 jyly týǵan, bul laýazymǵa deıin Mamlıýt aýdany ákiminiń orynbasary bolyp eńbek etti.
Tımırıazev aýdanynyń ákimi bolyp buǵan deıin osy aýdandy basqarǵan Erlan Jarov qaldy, ol 1982 jyly týǵan.
Jalpy SQO-da saılaýshylar tizimine 35 846 azamat engizildi. Daýys berýge 24 061 saılaýshy qatysty.
