SQO-da áskerge alynǵandar boryshyn Semeı men Nur-Sultanda óteıdi

PETROPAVL. QazAqparat – Soltústik Qazaqstan oblysynan 33 jigit Otan aldyndaǵy boryshtaryn óteý úshin ásker qataryna alyndy, dep habarlaıdy QazAqparat tilshisi.

Oblystyq Qorǵanys isteri departamenti baspasóz qyzmetiniń málimetinshe, olardyń 30-y Semeı qalasyna attandy. Bolashaq sarbazdar artıllerııalyq áskerı bóliminde jaýyngerlik daıarlyqtan ótedi. Taǵy úsheýi Nur-Sultan qalasyndaǵy Memlekettik kúzet qyzmetiniń «Aıbyn» prezıdenttik polkine jiberildi.

Bolashaq sarbazdardy ata-analary men týǵan-týystary shyǵaryp saldy. Sát sapar tilep kelgenderdiń arasynda Shal aqyn aýdany, Balýan aýylynyń týmasy 80-nen asqan Kúlásh áje de bar. Onyń eki nemeresi - Qaısar Ómirzaq pen Saıat Qajyǵalıev Qarýly kúshter qataryna alyndy.

Áskerge shaqyrylýshylardy alyp ketýge artıllerııalyq áskerı bólimniń ókili, podpolkovnık Dýlat Ahmethanov kelip, ata-analarmen júzdesti, kishigirim jınalys ótkizdi.

«Otan aldyndaǵy boryshty óteý – ár er azamat úshin abyroıly is. Elin, jerin qorǵaýǵa jaýyngerlerdi daıyndaý bizdiń basty baǵyttarymyzdyń biri. Sizderdiń uldaryńyzdy áskerde jaýyngerlik daıyndyqtan ótkizip, erjúrek, bolashaqtan mol úmit kúttiretin naǵyz er azamat etip shyǵaramyz. Bir sózben aıtqanda «Armııa» degen úlken ómir mektebinen ótedi», - degen Dýlat Ahmethanov, ata-analarǵa qazirgi zamanaýı áskerı bólimniń tynys-tirshiligi jáne kún tártibi týraly aıtty, olardyń qoıǵan suraqtaryna jaýap berdi.

Buǵan deıin 21 sarbaz Shyǵys Qazaqstan oblysynyń Kúrshim aýdanynda ornalasqan UQK Shekara qyzmetine alyndy.

SQO-da kúzgi merzimdi áskerge shaqyrý jeltoqsan aıyna deıin jalǵasady. Óńirden 500 adam Qarýly kúshter qataryn tolyqtyrmaqshy.