SQO-da ań aýlaý talaptaryn buzýdyń 400-den astam deregi tirkeldi
SQO polıtsııa departamenti baspasóz qyzmetiniń málimetinshe, kópjylǵy tájirıbe barysynda tabıǵat aıasynda demalýshylardyń atýǵa daıyndalǵan qarýdy tasymaldaıtyny anyqtalǵan. Bul - óreskel qatelik.
Tasymaldanatyn qarýdyń oǵy alynǵan, bólshektelgen jáne qarý qabyna salynǵan bolýy qajet.
Polıtseıler reıd barysynda ishimdik ishken ańshylardy da jıi kezdestiredi. Buǵan qatań túrde tyıym salynǵan.
«Polıtsııa qyzmetkerleri tabıǵatty qorǵaý zańnamasyn saqtaý boıynsha ańshylyq jáne orman sharýashylyǵy ókilderimen birlesip turaqty túrde reıd ótkizedi. Ańshylyq maýsymy ashylýyna baılanysty bul jumys kúsheıtildi. Búgingi tańda sýyr, bódene men qaz, úırek, qasqaldaq aýlaý maýsymy ashyldy. Qyrkúıektiń alǵashqy kúnderinen janat tuqymdas ıtti, borsyq, kekilikti atýǵa ruqsat bar. Zańnama talaptary men qaýipsizdik qaǵıdalaryn qatań saqtaý qajettigin eske salamyz», - deıdi SQO PD JPQ basqarmasynyń bastyǵy Aıdyn Baımatov.
Polıtseılerdiń basty keńesi: qarýdy saqtaý jáne qoldaný ruqsaty merziminiń ótpegenine kóz jetkizý kerek. Qajet bolǵan jaǵdaıda jańa ruqsat resimdeńiz, óıtkeni ákimshilik jaýapkershilikke tartylýyńyz ábden múmkin.
Qoryqshynyń nemese janýarlar dúnıesin qorǵaý, ósimin molaıtý jáne paıdalaný jónindegi memlekettik ınspektordyń qatysýymen ǵana tuıaqty janýarlardy aýlaýǵa bolatynyn esten shyǵarmaǵan jón.
Tamyz aıynyń sońynda tabıǵatty qorǵaý polıtsııa qyzmetkerleri reıd ótkizdi.
Nátıjesinde qarýdy zańsyz saqtaýdyń 3 faktisin, ańshylar men balyqshylardyń tarapynan bolǵan 64 ákimshilik quqyq buzýshylyqty anyqtady.
Jalpy jyl basynan QR Ákimshilik quqyq buzýshylyq týraly kodeksiniń 382-baby «Janýarlar dúnıesin paıdalaný talaptaryn jáne ań aýlaý qaǵıdalaryn buzý» boıynsha 439 jáne QR ÁQBtK 383-baby «Balyq aýlaý jáne balyq resýrstary men basqa da sý janýarlaryn qorǵaý qaǵıdalaryn buzý» boıynsha 250 fakti anyqtaldy.