SQO-da alǵash ret ákeler forýmy ótti
Petropavlda «Men seniń ómirińniń jalǵasymyn» atty oblystyq ákeler forýmy ótti. Alǵash ret uıymdastyrylǵan is-sharaǵa zııaly qaýym ókilderi, qoǵam belsendileri, ardagerler, sondaı-aq oblystyń ár aýdanynan kelgen 200-den astam belsendi áke qatysty, dep habarlaıdy Kazinform.
Forýmnyń maqsaty – qoǵamda ata-ana mádenıetin qalyptastyrý, ákeniń bedeli men belsendiligin arttyrý, bala tárbıesindegi rólin kúsheıtý, otbasy qundylyqtaryn nasıhattaý, bala quqyǵy, bilimi, densaýlyǵy, qaýipsizdigi t.b. ózekti máselelerdi talqylaý.
«Forým óte mańyzdy, atyna zaty saı, «Men seniń ómirińniń jalǵasymyn» dep atalǵan. Ádette, biz ákeler qalaı oılaımyz? Balany oqytyp, kıindirip jatyrmyz, joǵary oqý ornyna túsirdik. Eldi kórsetip, qydyrtyp jatyrmyz. Bizdiń mıssııamyz osy dep bilemiz. Alaıda qazirgi bala ony qalamaıdy, búginginiń balasy ákeniń meıirimine, qamqorlyǵyna muqtaj. Ákesiniń ózine kóńil aýdaryp, sóıleskenin qalaıdy. Eger bolashaqty oılasaq, biz ákeler qaýymy jaýapkershilikti alyp, balaǵa meıirimimizdi, qamqorlyǵymyzdy aıamaı kórsete bilý paryz dep bilemin. Ákeler kóbine jumys isteımiz, paıda tabamyz, al bala sońǵy orynda qalyp qoıady. Abaı aıtpaqshy, eger bala ata-anadan meıirim kórmese qurbysyna barady, odan meıirim bolmasa ustazyna barady, odan qaıyr bolmasa kóshege barady», - deıdi «Senimen bolashaq» RQB quryltaıshysy, ıdeıa avtory Nurken Asanov.
Іs-shara SQO bilim basqarmasymen jáne «Senimen bolashaq» RQB birge uıymdastyryldy. Forýmnyń ekinshi bóliminde ákelerge semınar-trenıg ótti. Onda «Balanyń ómirindegi - áke: onyń róli men áseri» atty sektsııalar jumys istep, oblystaǵy bilikti psıholog mamandar bilimderimen bólisti.
Oǵan qosa, «Senimen Bolashaq» RQB ata-analarǵa arnalǵan tárbıe quraly retinde alash zııalylarynyń eńbekterin qaıta basyp shyǵaryp, kópshilik nazaryna kórme usyndy. Onyń ishinde Maǵjan Jumabaevtyń «Pedagogıka» kitaby, Júsipbek Aımaýytovtyń «Tárbıege jetekshi», Mirjaqyp Dýlatovtyń «Oıan qazaq» kitaby bar. Qaıta jaryq kórgen Máshhúr Júsip Kópeıulynyń 5 tomdyq eńbegi 100 mektep, 100 kitaphanaǵa, 100 ýnıversıtetke tegin taratylǵan.
«Alash zııalylarynyń eńbekterin qaıta basyp shyǵaryp, ata-anaǵa pedagogıkalyq-psıhologııalyq qoldaý berý baǵytynda osyndaı aǵartýshylardyń eńbekterin jaryqqa shyǵardyq. Mysalǵa, Júsipbek Aımaýytovtyń «Tárbıege jetekshi» kitaby 100 jyldan keıin qaıta jaryq kórip, respýblıka kóleminde 2 myń danadan taratyldy. Jalpy búginde birlestik tarapynan 8 kitap basyp shyǵaryldy», - deıdi osy birlestiktiń Astanadaǵy fılıalynyń basshysy Sherhan Jumabekuly.
Jalpy mańyzdy forým endi jyl saıyn ótkiziledi dep josparlanyp otyr.