SQO-da alaıaq 80 jastaǵy áıeldi aldap, 270 myń teńgesiniń ornyna qaǵazdy ustatyp ketken

PETROPAVL. QazAqparat – Soltústik Qazaqstan oblysy Taıynsha aýdanynda 80 jastaǵy áıel alaıaqqa jem boldy. Polıtseıler qylmyskerdi alysqa uzatpaı ustap, zeınetkerdiń tyrnaqtap jıǵan 270 myń teńgesin qaıtaryp berdi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Taıynsha aýdany Kellerovka aýylynyń 80 jastaǵy turǵyny alaıaqqa aldanyp qalǵan.

Beıtanys áıel onyń úıine kirip, áńgimege tartqan, sóz barysynda zeınetkerdiń jıi aýyrýy onyń jasyna baılanysty emes, «dýalaýdyń» saldary ekendigin sendirgen.

Basyńdaǵy «dýany» alamyn dep, birqatar maǵynasyz áreket jasaǵannan keıin, alaıaq zeınetkerdiń jıǵan-tergen aqshasyn da «tazartý» kerek dep aıtqan.

Alaıaqtyń sózinen kúmándanbaǵan ájeı barlyq aqshasyn – shamamen 270 myń teńgeni alyp shyqqan. Keıin ol qaıtarǵan aqshasyn qaıta sanap, azaıyp qalǵanyn bilgen. Dereý polıtsııaǵa júgingen.

Jedel-tergeý tobynyń qyzmetkerleri alaıaqtyń zeınetkerge aldyn-ala daıyndalǵan sývenırlik qaǵaz aqshalardy bergenin anyqtady.

«Beınebaqylaý kameralaryndaǵy jazbalardy tekserý kezinde jedel ýákilder qara tústi «Skoda Octavia» avtomashınasyn baıqady. Jedel-izdestirý is-sharalary nátıjesinde buryn osyndaı qylmystar jasaǵany úshin sottalǵan Qostanaı qalasynyń 50 jastaǵy turǵyny ustaldy.

Qazirgi ýaqytta is materıaldary QR QK 190-baby «Alaıaqtyq» boıynsha sotqa jiberildi. Turǵyndardan jalǵyzbasty qart týystarymen sóılesip, bóten adamdy úıge kirgizbeý qajettigin jáne osyndaı túrli «rásimder» jasaý arqyly bolatyn alaıaqtyq týraly aıtyp túsindirýdi suraımyz», - deıdi aýdandyq PB bastyǵy Nurlyjan Aqtanov.