SQO-da ákimshilik quqyq buzý boıynsha kórsetilim sot protsesteri ótkizilip jatyr

PETROPAVL. KAZINFORM — Soltústik Qazaqstan oblysynda kólikke mas kúıde otyrǵan eki júrgizýshi sottalyp, protseske jasóspirimder men stýdentter qatysty.

SQO prokýratýrasynyń málimetinshe, Petropavl qalasynyń mamandandyrylǵan ákimshilik sotynda kólikti mas kúıde basqarý faktileri boıynsha ister qaraldy.

Aıyptalýshylardyń biri, sondaı-aq, júrgizýshi kýáliginsiz kólik basqarǵan. Sot qaýlysymen olar 7 jyl merzimge kólik júrgizý quqyǵynan aıyrylyp, 15 jáne 20 táýlikke ákimshilik qamaýǵa alyndy.

Buǵan deıin Qyzyljar aýdandyq sotynda alıment tóleýden jaltarǵan boryshkerge qatysty sot protsesi ótkizildi. Kórsetilim tártibindegi bul is boıynsha boryshker 2 táýlikke qamaýǵa alyndy.

— Ákimshilik quqyq buzýshylyqtar boıynsha kórsetilim sot protsesterin uıymdastyrýdyń mańyzy zor. Negizgi maqsaty — jastar arasynda quqyqtyq sana qalyptastyrý, azamattardyń sot júıesine degen senimin nyǵaıtý jáne ákimshilik is júrgizýdiń jarııalylyq, zańdylyq qaǵıdattaryn keńinen tanytý.

Jasóspirimder men stýdentterdiń qatysýymen mundaı kórsetilim sot protsesteri apta saıyn turaqty túrde ótkizilip otyrady, — deıdi prokýratýra ókilderi.

Oblys prokýratýrasynyń málimetinshe, osy jyldyń alǵashqy bes aıynda ákimshilik quqyq buzýshylyq boıynsha 4 220 is qaralǵan, bul ótken jyly osy kezeńde qaralǵan isterden júzge artyq. Qamaýǵa alynǵandar sany da artqan, bıyl — 2 257, byltyr 1 766 adam qamaldy. 1 794 adamǵa jalpy somasy 314 mln teńgeden astam aıyppul salynǵan. 169 quqyq buzýshyǵa eskertý jasaldy.

— Sottarda qaralatyn ákimshilik isterdiń basym bóligi usaq buzaqylyq, qoǵamdyq oryndarda mas kúıde júrý, kólikti basqarý erejesin buzý, sot sheshimderin oryndamaý, qorǵaý uıǵarymdaryn buzý jáne otbasylyq-turmystyq janjaldar, — deıdi prokýrorlar.

Buǵan deıin SQO-da bıyl alıment boıynsha toǵyz boryshker qylmystyq jaýapkershilikke tartylǵanyn jazǵan edik.