SQO-da ákimshilik sottyń suraýyn aıaqasty etken 7 memqyzmetshi aıyppul tóledi
SQO óńirlik kommýnıkatsııalar qyzmetinde bir jyl ishindegi sot tóreligin iske asyrýdyń qorytyndysy boıynsha baspasóz máslıhaty ótti. Oblystyq sottyń ákimshilik ister jónindegi sot alqasynyń tóraǵasy Serikbol Saparǵalıevtiń aıtýynsha, byltyr mamandandyrylǵan aýdanaralyq ákimshilik sotyna 375 is túsken. Sonyń 111-i boıynsha sheshim shyǵaryldy, sonyń 80-inde talap qanaǵattandyryldy.
«Jańadan qurylǵan sotta qaralǵan alǵashqy is aýyl ákimine úmitkerden tústi. Saılaý komıssııasy onyń kandıdatýrasyn tirkeýden alyp tastaǵan. «Saılaý týraly» zańnyń talaptaryna sáıkes Qyzyljar aýdandyq soty ony sol kúni qarap, azamattyń talabyn qanaǵattandyrdy. Saılaý komıssııasy sot úkimin sol kúni oryndap, azamattyń aýyl ákimine kandıdattyǵy qalpyna keltirildi.
Budan basqa kásipkerlik sýbektilerine salyq, ákimshilik organdar júrgizgen tekseristerdiń zańsyz júrgizilgeni týraly sot úkimderi shyqty. Keıbiri moratorıı engizilgenine qaramastan tekserister júrgizgen», - deıdi Serikbol Saparǵalıev.
Sot alqasy tóraǵasynyń aıtýynsha, sot oryndaýshylarynyń áreketine aryzdanatyndar kóp.
«Sot oryndaýshysy boryshkerdiń dúnıe-múlkin saýda-sattyqqa shyǵaryp, úlestes tulǵalarǵa óte arzan baǵaǵa satqan. Sot oryndaýshysynyń áreketi zańsyz dep tanyldy. Jalpy byltyr 375 talap aryz tússe, sonyń ár besinshisi eki taraptyń mámilege kelýimen aıaqtaldy. Talapkerdiń ótinishimen 24 aryz qaıtaryldy. Bul da sottyń nátıjeli jumysynyń jemisi. Ádette mundaıda talapker óziniń qateleskenin bilip talabyn qaıtaryp alady nemese jaýap berýshi jibergen qateligin durystaýǵa is-shara qoldanady», - deıdi Serikbol Saparǵalıev.
Al sottyń suraýyna ýaqytynda jaýap bermegen 7 memlekettik qyzmetshige 10 AEK mólsherinde aıyppul salyndy. Olardyń ishinde Qyzyljar aýdanynyń ákimi, Petropavl qalalyq ákimdiginiń bólim basshysy, qyzmetkeri jáne Qyzyljar, Taıynsha aýdany bólimderiniń basshylary bar. Ákimshilik jazaǵa tartylǵandardyń taǵy ekeýi – sot oryndaýshylary.