SQO-da 9 myńǵa jýyq jas memtapsyrys aıasynda kolledjde tegin oqyp júr

PETROPAVL. QazAqparat – Soltústik Qazaqstan oblysynda tehnıkalyq jáne kásibı bilim berý mekemelerinde 11 myńǵa jýyq jas bilim alsa, sonyń 9 myńǵa jýyǵy memlekettik tapsyrys aıasynda oqyp jatyr, dep habarlaıdy QazAqparat tilshisi.

«Nur Otan» partııasy SQO fılıaly janyndaǵy bilim men ǵylymdy damytý jónindegi keńestiń otyrysynda joǵary jáne arnaýly orta bilim berýdiń máseleleri talqylandy.

Sonyń biri – jastardy kolledjderde qajetti jumysshy mamandyqtaryna tegin oqytý.

Qazirgi ýaqytta óńirde 23 kolledj bolsa, sonyń 19-y – memlekettik. Bul oqý oryndarynda 72 mamandyq boıynsha, 122 biliktilik boıynsha maman daıarlaıdy.

11 myńǵa jýyq jas bilim alsa, sonyń 80 %-y – 8 703 adam memlekettik tapsyrys boıynsha oqyp jatyr.

Onyń 3170-i bıyl tapsyrys aıasynda kolledjge tegin qabyldandy.

«Naryqta suranysqa ıe mamandardy daıarlaýǵa tapsyrys berildi. Nátıjesinde 3170 jasóspirim qabyldandy. Olardyń 2357-si 9-synyp túlekteri, qalǵany 11-synyptan keıin túskender. Balalardyń 1567-si jumysshy mamandyqtardy meńgeredi, 1603-i orta býyn mamandary bolyp shyǵady. Sonyń ishinde bilim, densaýlyq saqtaý, mádenıet, quqyq jáne basqarý, áleýmettik ǵylymdarmen aqparat, aqparattyq-kommýnıkatsııalyq tehnologııalar, qurylys, qaıta óńdeý, aýyl sharýashylyǵy, qyzmet kórsetý salalary bar», - deıdi SQO bilim basqarmasy basshysynyń orynbasary Vladımır Tkachenko.

Bıyl jańa oqý jylynda landshaftyq dızaın, ańshylyq jáne ań sharýashylyǵy mamandyqtary ashyldy.

Biraq keńes músheleri bul mamandyqtarǵa suranystyń bolatyndyǵyna kúmán keltirdi.

Bıyldan bastap kolledjder men joǵary oqý oryndaryna túsýge kópbalaly jáne tolyq emes, sondaı-aq múgedek balalary bar otbasylardan shyqqan jastar men I jáne II toptaǵy múgedekter úshin kvotalary qosyldy.