SQO-da 8 bóget qalpyna keltirilip jatyr

PETROPAVL. KAZINFORM – Soltústik Qazaqstan oblysy ótken kóktemdegi jaǵdaı qaıtalanbas úshin erterek qamdanyp jatyr. 

AMANAT partııasy SQO fılıaly baspasóz qyzmetiniń málimetinshe, Petropavldaǵy Ýşev kóshesindegi bóget 1960 jyly paıdalanýǵa berilgen. Bul mańyzdy nysan qalany sý tasqynynan qorǵaýda eleýli ról atqarady. Qazir bóget nyǵaıtylyp jatyr. Ótken kóktemdegi tasqyn sýdyń deńgeıi eskerilip, bógettiń bıiktigi 4,5 metrden 7 metrge deıin, eni 3 metrden 6 metrge deıin ulǵaıtyldy. Al uzyndyǵy 300 metrge deıin sozyldy. Qazirgi ýaqytta nysanǵa 205 myń tonna ınertti materıal jetkizildi. Búginde bógetti beton plıtalarymen nyǵaıtylyp jatyr.

Atqarylyp jatqan jumystardyń barysyn Májilis depýtattary Erkebulan Mámbetov, Dmıtrıı Koloda kórdi. 

- Bul sharalardyń barlyǵy ótken jylǵy jaǵdaıdyń qaıtalanýyn boldyrmaý maqsatynda qolǵa alyndy. Byltyr tasqynnan kóptegen adam zardap shekti. Qanshama úıge zaqym keldi. Bıyl buǵan jol bermeımiz. Qaıta qalpyna keltirý jumystary jaqsy deńgeıde júrgizilip jatyr, - dedi Erkebulan Mámbetov.

Jumysty «BUILDING STROY-2020» JShS atqaryp jatyr. Jobanyń jalpy quny 851 mln teńge. Qurylys barysynda sapaly materıaldar men zamanaýı tehnologııalar qoldanyldy. Bul bógettiń paıdalaný merzimin uzartpaq. 

Jalpy óńirde qazir 8 bóget qalpyna keltirilip jatyr. 

Esterińizge salaıyq, 2024 jyldyń kókteminde SQO-da rekordtyq sý tasqyny tirkelip, óńirge úlken zııan keltirdi. Óńirde 4 myńnan astam turǵyn úı, 45 kásipkerlik nysan, 42 avtojol ýchaskesi zaqymdandy.

Buǵan deıin Petropavldaǵy «Bıotoǵan» — sarqyndy sý jınaqtaǵysh aınalasyndaǵy bóget nyǵaıtylyp jatqanyn jazǵan edik.