SQO-da 600-ge jýyq adam Pfizer vaktsınasyn alýǵa kelisken
Óńirlik kommýnıkatsııalar qyzmetinde SQO-daǵy koronavırýsqa qatysty jaǵdaı jáne vaktsınatsııa barysy týraly brıfıng ótti.
SQO densaýlyq saqtaý basqarmasy bastyǵynyń orynbasary Qumar Kúsemisovtiń aıtýynsha, 2 574 bala koronavırýspen aýyrǵan. 2 410 bala táýir boldy. Qazir 200 bala kúndelikti dárigerlerdiń baqylaýynda. Olardyń 30-ynyń jaǵdaıy ortasha, statsıonarda em alyp jatyr. Koronavırýstan, ókinishke oraı, bir bala qaıtys boldy.
Pandemııa bastalǵaly KVI-di 638 júkti áıel juqtyrdy. 128 jaǵdaıda kelinshekterdi merziminen buryn bosandyryp alýǵa týra kelgen. Olardyń ishinde 65 sábı shala týdy, úsheýi merzimi óte kishkentaı bolǵandyqtan qaıtys bolǵan. Búginde 16 áıel dárigerlerdiń baqylaýyna alynǵan. Sondaı-aq jaqynda júkti áıelderdiń bireýiniń jaǵdaıy koronavırýstan keıin tómendep, kóz jumdy. Onyń ókpesi qabynǵan eken.
«Oblysta balalardy, júkti áıelderdi jáne bala emizetin áıelderdi vaktsınatsııadan ótkizý bastaldy. Shetelderde balalar men jasóspirimder vaktsınatsııasy qarqyndy júrip jatyr. Eýropa elderi mamyr aıynda ekpe jumystaryn bastap ketti. Pfizer kompanııasynyń vaktsınasyn AQSh, Ulybrıtanııa, Germanııa, Izraıl, Birikken Arab ámirlikteri, Japonııa qoldanyp jatyr. Máselen, Sıngapýr jasóspirimderdiń 80 %-yna ekpe qoıdy. Jańaǵy men atap ótken elder qazir 5 jastan 11 jasqa deıingi balalardy vaktsınatsııamen qamtýdy oılastyryp jatyr.
Vaktsına qymbat, ony tasymaldap, saqtaý kóp qarajatty qajet etedi. Memleket bul preparatty tegin qoıýǵa múmkindik jasap otyr. Emhanalarda vaktsınatsııa bastaldy. Qajettilik bolǵan jaǵdaıda jasóspirimderge mektepterde ekpe júrgiziledi. Eshkimdi májbúrlemeımiz, tek qana jazbasha ruqsattan keıin ǵana vaktsına egiledi. Qazirgi tańda 4550 júkti áıelge, 12 men 18 jas aralyǵyndaǵy 20 050 jasóspirimge jáne 6 105 myń bala emizetin áıelge vaktsına qoıý josparlanǵan. Qajetti preparat satyp alynyp, jetkizildi», - deıdi Qumar Kúsemisov.
Qazir mektepterde ata-analar jınalystary ótkizilip, túsindirý jumystary júrgizilip jatyr.
«Ata-analar tarapynan suraqtar kóp, qyzyǵýshylyq bildirip jatyr. Pfizer kompanııasynyń preparaty Dúnıejúzilik densaýlyq saqtaý uıymy balalar men júkti áıelderge qoıýǵa ruqsat bergen jalǵyz vaktsına. Sondyqtan qaýipsiz. Qazirgi ýaqytta oblystyń eresek turǵyndarynyń 70 %-y vaktsınatsııadan ótti. Ekpe alýdan keıin asqyný jaǵdaılary tirkelgen joq.
Qazir bizge balalaryna shetelderde vaktsına qoıǵyzǵan ata-analar habarlasyp jatyr. Olar balalarynyń vaktsınatsııa pasportyn elimizde tirkemek. Bul másele sheshimin tabady», - deıdi Qumar Kúsemisov.
Qazirgi málimet boıynsha, Pfizer vaktsınasyn saldyrýǵa 586 adam kelisimin bergen. Onyń ishinde jasóspirimder, júkti jáne bala emizetin áıelder bar. Keshe 56 adam vaktsına aldy.
