SQO-da 59 synyp qashyqtan oqýǵa kóshirildi

PETROPAVL. KAZINFORM — Soltústik Qazaqstan oblysynda ótken aptada 4,3 myń adam JRVI-men aýyrdy. Tumaý juqtyrǵandar sany da artty. 

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde epıdemıologııalyq maýsym bastalǵaly JRVI-diń 18 623 jaǵdaıy tirkeldi. Bul ótken jyldyń sáıkes kezeńimen salystyrǵanda 26% tómen. Syrqattanǵandardyń 67% — 14 jasqa deıingi balalar.

Qarasha aıynyń basynan oblysta A/H3N2 tıpti tumaýdy juqtyrýdyń 45 jaǵdaıy anyqtaldy, syrqattanǵandardyń 73% — 33-i eresekter, qalǵany balalar.

Budan bólek tumaýǵa jatpaıtyn rınovırýstardyń — 9, adenovırýstardyń — 2 jaǵdaıy tirkeldi.

SQO bilim basqarmasy baspasóz qyzmetiniń málimetinshe, óńir mektepterindegi 59 synypta 506 oqýshynyń aýyrýyna baılanysty qashyqtan oqytý formaty engizildi. Bul shara bilim alýshylar arasynda maýsymdyq vırýstyq juqpalardyń taralýyna jol bermeýge baǵyttalǵan.

Mamandardyń aıtýynsha, synyptaǵy balalardyń 30% astamy aýyrǵan jaǵdaıda synyp onlaın formatqa aýystyrylady. Qazir Petropavlda qashyqtan oqytýdyń ishinara formaty 8 mektepte, Aıyrtaý aýdanynda osyndaı aldyn alý sharasy bir mektepte júzege asyrylǵan, munda 20 qarashadan 3 jeltoqsanǵa deıin 19 synyp qashyqtan oqytýǵa aýystyryldy.

Tımırıazev aýdanynda qashyqtan oqytýǵa 3 bilim berý uıymy kóshti.

Esterińizge salaıyq, SQO-da joǵary dene qyzýymen jedel járdem qyzmetine júgingender sany eki ese artqanyn jazǵan edik.