SQO-da 50 shaqty mektep kúrdeli jóndeýden ótip jatyr

PETROPAVL. QazAqparat – Soltústik Qazaqstan oblysynda bıyl 50 shaqty mektep jańa oqý jylyna kúrdeli jóndelip jatyr. Bul maqsatqa 4,3 mlrd teńge jumsalmaq, dep habarlaıdy QazAqparat tilshisi.

SQO bilim basqarmasy baspasóz qyzmetiniń málimetinshe, bıyl kúrdeli jóndelip jatqan mektepterdiń basym bóligi aýyldarda ornalasqan.

Sonyń biri - Qyzyljar aýdanyndaǵy Bolshaıa malyshka mektebi. Ǵımarat 1975 jyly salynyp, búginge deıin biraq ret kúrdeli jóndelgen eken.

2013 jyly bilim ordasyn qalpyna keltirýge 13 mln teńge bólinse, osy joly oǵan 10 ese kóp qarajat jumsalmaq.

«Kópten kútken jóndeý «Aýyl – el besigi» baǵdarlamasy aıasynda júrgizilip jatyr. Joba boıynsha mekteptiń shatyry jańartylady. Jylytý jáne jaryqtandyrý júıesi aýystyrylyp jatyr. 2013 jyly kóshe jaqqa shyǵatyn terezeleri ǵana plastıkke aýystyrylsa, endi qalǵany jańartylady», - deıdi SQO bilim basqarmasy basshysynyń orynbasary Vladımır Tkachenko.

Aýyl mektebinde 169 bala oqıdy. Bilim berý mekemesinde 40 balaǵa shaqtalǵan shaǵyn ortalyq pen ınternat bar.

Internatta jaqyn mańdaǵy 5 eldi mekenniń balalary jatyp oqıdy. Mekteptiń bir ereksheligi – ǵımaratqa bıootynmen jaǵylatyn qazandyq ornatylǵan.

Jylytý júıesin jańǵyrtý nátıjesinde balalar jyly synyptarda oqıtyn bolady.

Jalpy SQO-da «Aýyl – el besigi» baǵdarlamasy aıasynda 27 bilim berý mekemesin jónge keltirý josparlanǵan.

Osy maqsatqa el qazynasynan 3 mlrd astam teńge bólindi. Buǵan qosymsha oblystyq bıýdjetten 23 mektepke jóndeý júrgizilmek.

«Bıyl jóndeletin 38 mektep aýyldarda ornalasqan. Budan bólek oblys ortalyǵynyń barlyq bilim berý mekemelerinde aǵymdaǵy jóndeý jumystary júrgizilmek. Mektepterdiń shatyry, edeni, terezeleri men esikteri aýystyrylady. «Jas maman» baǵdarlamasynyń aıasynda oblysqa 175 mln teńge bólindi. Bul qarajatqa kolledjderge zamanaýı qondyrǵylar alynady», - deıdi Vladımır Tkachenko.