SQO-da 50 shaqty mektepte ınternet jyldamdyǵy óte tómen
PETROPAVL. KAZINFORM – Soltústik Qazaqstan oblysynda bilim berý nysandarynyń jańa oqý jylyna daıyndyǵy máselesi qaraldy. Bıyl óńirde 53 bilim berý nysanyn kúrdeli jóndeýden ótkizýge 6,1 mlrd teńge bólindi.
Oblystyq ákimdikte ótken jıynda bilim basqarmasy basshysynyń orynbasary Tatıana Protopopova esep berdi. Mamannyń aıtýynsha, bıylǵy oqý jylynda daıyndyq tobynyń 1500-ge jýyq jáne bastaýysh synyptyń 30 myńǵa jýyq oqýshysy tegin ystyq tamaqpen qamtylady. Bul maqsatqa bıyl 3 mlrd 423 mln teńge qarajat bólingen. Bıyl 53 bilim berý mekemesine kúrdeli jóndeý júrgizýge 6 mlrd astam teńge bólindi. «Aýyl - el besigi» baǵdarlamasy boıynsha 2,7 mlrd teńgege 22 mektep jóndeýden ótti. Oblystyq bıýdjetten bólingen qarajatqa 31 bilim ordasy qaıta qalpyna keltirilgen.
Aımaq basshysy blok-modýldik qazandyqtardy ornatýdy qysqa merzimde aıaqtap, mektepterdiń jylý berý maýsymyna tolyq daıyn bolýyn qamtamasyz etýdi, sondaı-aq bilim berý nysandaryndaǵy barlyq jóndeý jumystaryn der kezinde aıaqtaýdy tapsyrdy.
«Erekshe qajettilikteri bar balalar úshin «Bereke» shaǵyn aýdanyndaǵy 50 oryndyq jataqhanasy bar 300 balaǵa shaqtalǵan arnaýly mektep bıyl jumysyn bastaıdy. «Jaıly mektep» ulttyq jobasy aıasynda «Bereke» jáne «Orman» shaǵyn aýdandarynda 2 mekteptiń qurylysy júrgizilip jatyr. Búginde 440 mektepte ınternet jyldamdyǵy 20 Mbıt/sek jáne odan joǵary, onyń ishinde 140 mektepte Starlink jabdyǵyn ornatý esebinen jyldamdyq ulǵaıdy», - dedi SQO ákimi Ǵaýez Nurmuhambetov.
SQO Bilim salasynda sapany qamtamasyz etý departamentiniń málimetinshe, óńirdegi 33 mektepte ınternettiń jyldamdyǵy bekitilgen norma - 20 Mbıt/sek tómen. Al 14 mektepte tipti 2-4 Mbıt/sek shamasynda ǵana.
Sondaı-aq vedomstvo mektepterdiń oqýlyqpen qamtylýyna monıtorıng júrgizip jatyr. SQO mektepteri úshin baspalardan oqýlyqtardy jóneltý 77%, aýdandarǵa jetkizý 35% jetti. Ýálıhanov jáne Tımırıazev aýdandarynyń bilim bólimderiniń aqparaty boıynsha jetkizýshilermen problemalar bar, bul másele baqylaýǵa alynǵan.
Buǵan deıin «Mektepke jol» aktsııasy aıasynda Qulsaryda 770 oqýshyǵa mektep quraldary berilgenin jazǵan edik.
