SQO-da 4,5 myń adam qarjylyq saýatyn arttyrý úshin kýrstan ótedi
PETROPAVL. KAZINFORM – Soltústik Qazaqstan oblysynda byltyr bastalǵan «Qaryzsyz qoǵam» jobasy bıyl da jalǵasyn tapty. Bul joly uıymdastyrýshylar Petropavldyń jáne taǵy úsh aýdannyń turǵyndaryn qamtymaq.
«AMANAT» partııasy SQO fılıaly baspasóz qyzmetiniń málimetinshe, joba boryshkerlerdiń sanyn azaıtyp, halyqtyń qaryz júktemesin tómendetýge baǵyttalǵan. Qarjyny durys jaratýdy bilmegendikten, beıbereket nesıe ala bergendikten turǵyndardyń arasynda qıyn jaǵdaıǵa tap bolǵandar jeterlik. Jobanyń maqsaty – osyndaı jandardy anyqtap, olarǵa kómek berý.
«Halyqtyń basym kópshiligi asa qajeti joq taýarlar men qyzmetterdi de nesıege rásimdeıdi eken. Máselen byltyr baǵdarlama bastalǵan kezde biz óz nesıeleri týraly aıtqysy kelmeıtin jandarmen kezdesý ótkizdik. Onyń arasynda 18 nesıesi bar, qaryzǵa belsheden batqan azamatqa kómektestik. Kredıtin 18-den 2-ge deıin ońtaılandyrdyq. Bir sózben aıtqanda, joba óz nátıjesin beredi», - deıdi qarjylyq saýattylyq jónindegi sarapshy, trener Dmıtrıı Shledevıts.
Bul joly 4,5 myń adam Petropavlda jáne Aıyrtaý, Esil jáne Mamlıýt aýdandarynda kýrstan ótedi.
Ótken jyly oqý kýrsy aıasynda nesıe boıynsha bereshegi bar 30-dan astam azamat zań kómegin aldy. Qazir jumyspen qamtý ortalyǵynda áleýmettik qyzmetkerler bilimderin jetildirip jatyr. Halyqpen tikeleı jumys isteıtin mamandar kýrs barysynda qarjylyq saýattylyqty arttyryp qana qoımaı, alaıaqtardyń arbaýyna túspeýdiń joldaryn da úırenedi.
«Qaryzsyz qoǵam» jobasy jeltoqsan aıyna deıin jalǵasady. Byltyr 4 myńnan astam soltústikqazaqstandyq oqý kýrsynan ótti.
