SQO-da áıel separatızmdi nasıhattaǵany úshin sottaldy

PETROPAVL. KAZINFORM – Soltústik Qazaqstan oblysy Mamlıýt aýdanynyń turǵyny, 4 balasy bar L. esimdi áıel áleýmettik jeliniń tikeleı efırinde separatıstik kózqarasyn bildirgeni úshin sottaldy.

SQO sotynyń málimetinshe, Mamlıýt aýdandyq soty L.-ǵa QR QK 180-baby 2-bóligi - «Telekommýnıkatsııa jelilerin paıdalana otyryp, Qazaqstannyń birtutastyǵyn, onyń aýmaǵyna qol suǵylmaýyn jáne bólinbeýin buzýdy nasıhattaý» boıynsha qylmystyq isti qarady.

L. bıyl naýryz aıynyń basynda «Tik-Tok» áleýmettik jelisine uıaly telefon arqyly kirip, belgisiz er adammen tikeleı baılanysqa shyqqan. Dıalog barysynda ol Soltústik Qazaqstannyń Reseıge qosylýy jáne Qazaqstannyń jekelegen bólikteriniń Reseı aýmaǵyna tarıhı qatystylyǵy týraly oıyn aıtyp, Soltústik Qazaqstannyń, sonyń ishinde Petropavldyń tarıhı túrde Reseıdiń ákimshilik-aýmaqtyq bólinisiniń birligi ekendigin ashyq aıtty, sondaı-aq Reseı áskerleriniń Qazaqstan aýmaǵyna qarýly basyp kirýin qoldaıtyndyǵyn jetkizgen.

Prokýror L.-ny 6 jylǵa bas bostandyǵynan aıyrýdy surady.

Aıyptalýshy L. kinásin moıyndady.

Nátıjesinde aýdandyq sot L.-nyń shyn júrekten ókinýin jáne tórt jas balasynyń bolýyn, kúıeýiniń múgedektigi baryn eskerdi. Muny onyń jazasyn jeńildetetin jaǵdaı retinde qarap, 3 jylǵa bas bostandyǵynan aıyrý jazasyn kesti.

Úkim zańdy kúshine engen joq.

Byltyr qarasha aıynda Petropavlda bir top separatıske qatysty sot úkimi shyqqanyn jazǵan edik.