SQO-da 3,8 myń jasóspirim qyzǵa adam papıllomasy vırýsyna qarsy ekpe salynady

PETROPAVL. KAZINFORM — Qazaqstanda jatyr moıny obyry — áıelder arasyndaǵy onkologııalyq aýrýlar statıstıkasy boıynsha sút bezi obyrynan keıin ekinshi orynda tur. Qaterl isiktiń aldyn alý maqsatynda bıyl jasóspirim qyzdarǵa adam papıllomasy vırýsyna qarsy ekpe salynady.

Soltústik Qazaqstan oblysy sanıtarııalyq-epıdemıologııalyq baqylaý departamenti baspasóz qyzmetiniń málimetinshe, adam papıllomasy vırýsyna qarsy ekpe egý bıyl qyrkúıek aıynda bastalady. Negizinen 11 jasar jasóspirim qyzdar qamtylmaq.

Olar ekpeni ata-analarynyń jazbasha kelisimimen jańa oqý jyly bastalysymen tegin ala alady. Oblysta barlyǵy 3800 qyzdy egý josparlanǵan.

«Qazaqstanda áıelder onkologııasynda sút bezi obyry birinshi orynda tursa, jatyr moıny obyry ekinshi orynda keledi. Elimizde kún saıyn osy qaterli isiktiń 5 jańa jaǵdaıy tirkeledi, osy aýrýdan kúnine eki áıel kóz jumady. Sondyqtan álem onkologtary qaterli isik týdyratyn adam papıllomasy vırýsyna qarsy vaktsınatsııalaýdy usynyp otyr. Adam papıllomasy vırýsynan týyndaǵan aýrýlar jasyryn bastalyp, sozylmaly túrde damyp, qaterli jáne qatersiz isik týdyrady. Bul adamnyń aýyz qýysy men jynys músheleriniń terisi men shyryshty qabyǵyna áser etetin ózara uqsas vırýstardyń 200-den astam túri. Kóp jaǵdaıda bul ınfektsııa 2-3 jyldan keıin ózdiginen táýir bolady jáne kóbinese adam baıqamaıdy. Keıbir jaǵdaılarda, adam papıllomasy vırýsynyń onkogendik túrleri aǵzada qalyp qoyp, bul ártúrli organdardyń qaterli isigine ákeledi. Eń aldymen — jatyr moıny obyryna ákeledi. 100% jaǵdaıda jatyr moıny obyry osy vırýstan týyndaıdy», — deıdi SQO sanıtarııalyq-epıdemıologııalyq baqylaý departamentiniń basshysy Áset Jumataev.

Mamannyń aıtýynsha, ınfektsııa aýrý adam nemese tasymaldaýshydan juǵady.

«Vırýs úsh jolmen taralady — jynystyq, janasý-turmystyq, ıaǵnı teriniń shaǵyn jaraqattary arqyly jáne perınataldyq — anadan balaǵa berledi. Ádette ol adamdarda ımmýnıtet álsiregen sátte, mysaly, tumaý jáne basqa juqpaly aýrýlardan keıin paıda bolady. Denege bir ret engennen keıin vırýs qalady. Adam papıllomasy vırýsyna qarsy ekpe — qazaqstandyq áıelderdi jatyr moıny obyrynan ǵana emes, basqa da onkologııalyq aýrýlardyń damýynan qorǵaýdyń zamanaýı jáne barynsha tıimdi tásili. Tıimdiliktiń 95% jýyq», — deıdi Áset Jumataev.

Ekpe ıyqqa, standartty 0,5 ml kólemde bulshyqet ishine engiziledi. Ekpege qarsy kórsetilimder bolmaǵan jaǵdaıda dárigerdiń qaraýynan keıin 6 aı aralyqpen eki ret júrgiziledi.

Adam papıllomasy vırýsyna qarsy ekpe úshin Dúnıejúzilik densaýlyq saqtaý uıymymen sertıfıkattalǵan jáne tıimdiligi men qaýipsizdigi dáleldegen «Merk Sharp jáne Doým» (AQSh) kompanııasy shyǵarǵan 4 valentti «Gardasıl» vaktsınasy qoldanylady.

«Búgingi tańda adam papıllomasy vırýsyna qarsy ekpeler 15 jyldan astam ýaqyt boıy qoldanylyp keledi jáne álemniń 135 elinde, sonyń ishinde Ózbekstan, Qyrǵyzstan, Túrikmenstanda júrgiziledi. AQSh pen Avstralııa sııaqty kóptegen elder ony jatyr moıny obyryna qarsy ulttyq baǵdarlamalaryna engizdi. Skrınıngtik baǵdarlamalarmen birge bul elderdegi jatyr moıny obyrynyń jıiligi men ólimin aıtarlyqtaı azaıtýǵa kómektesti», — deıdi Áset Jumataev.

Ázirge adam papıllomasy vırýsyna qarsy preparat SQO-ǵa jetkizilgen joq.

Buǵan deıin dári-dármektiń shekti baǵasyn Dari.kz mobıldik qosymshasy arqyly baqylaýǵa bolatynyn jazǵan edik.