SQO-da 3 jasar bala terezeden qulap ketti

PETROPAVL. KAZINFORM – Soltústik Qazaqstan oblysynda byltyr úsh bala terezeden qulap ketse, bıyl bir bala aýyr jaraqat aldy.

SQO Tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, jyl basynan beri respýblıka boıynsha osyndaı 60 jaǵdaı boldy, onyń ishinde jasy 2-13 aralyǵyndaǵy 5 bala oqıǵa ornynda kóz jumdy. Qalǵan 55 bala túrli dene jaraqattarymen aýrýhanaǵa jetkizilgen. 2024 jyly 196 fakt tirkeldi. 

– Balalardyń terezeden qulap ketý oqıǵalary – balalar jaraqattanýy men ólim-jitimniń negizgi sebepteriniń biri bolyp otyr. Ásirese kóktem-jaz mezgilderinde, balalar jazǵy demalysqa shyqqan ýaqytta, mundaı jaǵdaılardyń sany kúrt artady.

28 sáýir kúni Ǵ.Músirepov atyndaǵy aýdannyń Vozvyshenka aýylynda ata-anasynyń qaraýynsyz qalǵan 3 jasar bala birinshi qabattaǵy terezeden qulap ketken. Bala ashyq bas-mı jaraqaty, bas súıeginiń synýy, mı soǵylýy sııaqty aýyr jaraqattarmen aýrýhanaǵa jatqyzyldy, - deıdi Dmıtrıı Rastıhın.

Byltyr tirkelgen úsh oqıǵanyń úsheýi de Petropavlda bolǵan, úsh jaǵdaıda da 3 jasar bala joǵary qabattan qulap ketip, aýyr jaraqattandy. 

SQO Tótenshe jaǵdaılar departamenti mundaı qaıǵyly jaǵdaılardyń aldyn alý maqsatynda úı aralap, ata-analarmen kezdesýler, balabaqsha men mektepterde túsindirý sharalaryn qolǵa alǵan.

- Terezeden qulaý jaǵdaılary kóbine balanyń qaraýsyz qalýy men moskıt toryna súıenip otyrý saldarynan bolady. Tor bala salmaǵyna shydamaıdy. Balany eshqashan jalǵyz qaldyrmańyz, terezege arnaıy fıksatorlar men blokıratorlar ornatyńyz, tereze mańyna jıhaz qoımańyz – bul balalardyń terezege shyǵýyn jeńildetedi. Balalardyń qaýipsizdigi – barshamyzdyń ortaq mindetimiz, - deıdi Dmıtrıı Rastıhın.

Al, Qyzylorda oblysynda byltyr 17 bala terezeden qulap ketken.