SQO-da 20 jylda 139 eldi meken kartadan joıylyp ketken
PETROPAVL. KAZINFORM – Soltústik Qazaqstan oblysynda 45 eldi meken qysqartýǵa ushyraıdy. Bul eldi mekenderde qazir 258 adam turyp jatyr.
SQO densaýlyq saqtaý basqarmasy basshysy orynbasarynyń mindetin atqarýshy Nursultan Sarjanov oblystyq qoǵamdyq keńeste eldi mekenderdi qysqartý máselesine toqtaldy. Aýyldyq eldi mekenderdiń áleýmettik-ekonomıkalyq damý monıtorıngi qorytyndysy boıynsha oblysta halyq sany 50 adamnan aspaıtyn 45 aýyl anyqtalǵan.
Bul eldi mekenderde turatyn 258 adamnyń 75-i — zeınetkerler men balalar. Nátıjesinde Esil aýdanynda — 8, Taıynshada — 6, Jambylda — 6, M.Jumabaevta — 6, Mamlıýtte — 5, Aqqaıyńda — 3, Ýálıhanovta — 3, Qyzyljarda — 2, Tımırıazevte — 2, Ǵ. Músirepovte — 2 jáne Shal aqyn aýdanynda eki eldi meken qysqartylmaq.
— Aýyldardyń turǵyndarynyń pikiri eskerildi, jınalystar ótkizilip, taratý týraly sheshim qabyldandy, óıtkeni bul aýyldarda áleýmettik ınfraqurylym múldem joq. Áleýmettik nysandar jabylyp qalǵan, ortalyqtandyrylǵan sýmen jabdyqtaý júıesi 20 eldi mekende ǵana bar, 4 aýylǵa sý tasyp jetkiziledi. Demografııalyq jaǵdaıdyń jyl saıyn nasharlaýyna jáne áleýmettik nysandardyń, sondaı-aq jumysqa ornalasý múmkindiginiń bolmaýyna baılanysty qysqartý qajettiligi týyndady, bul bıýdjet qarajatyn áleýeti joǵary eldi mekenderge tıimdi jumsaýǵa múmkindik beredi. Taǵy bir sebep — turǵyndarǵa ómir súrýge jaıly ortany jáne olardyń qaýipsizdigin qamtamasyz etý, — deıdi Nursultan Sarjanov.
Mamannyń aıtýynsha, 2000 jyldan 2019 jylǵa deıin óńirde 139 eldi meken joıylǵan. 2020-2022 jyldary aralyǵynda pandemııaǵa jáne halyq sanaǵyna baılanysty bul jumys atqarylmaǵan.
— Turǵyndar qalaýy boıynsha ózine yńǵaıly eldi mekenge kóshe alady nemese osy aýylda tura beredi. Taratylǵan kezde aýyldyń ataýy ǵana alynyp tastalady, al memlekettiń mindettemeleri saqtalady. Jalpy, jumysqa ornalasýǵa kómek kórsetiledi. Sondaı-aq kóshýge nıet bildirýshiler úshin otbasynyń árbir múshesine jergilikti bıýdjetten 15 AEK mólsherinde ótemaqy bar, al qonys aýdarýǵa tańdaǵan aýylda bos turǵyn úı bolǵan jaǵdaıda jalǵa beriletin turǵyn úımen qamtamasyz etiledi, — deıdi Nursultan Sarjanov.
Esterińizge salaıyq, buǵan deıin SQO-da qysqartýǵa ilikken eldi mekenderdiń tizimin jarııalaǵan edik.