SQO-da 2 kúnde telefon alaıaqtyǵynyń 13 faktisi tirkeldi

PETROPAVL. QazAqparat – Soltústik Qazaqstan oblysynda telefon alaıaqtyǵynyń sany artty. Tek eki kúnde óńirde osyndaı 13 qylmys tirkeldi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, telefon alaıaqtary ásirese 8 jáne 9 mamyrda belsendilik tanytqan, dál osy kúnderi bir tásil boıynsha aldaýdyń 13 faktisi tirkeldi.

Alaıaqtar jábirlenýshilerge ózderin polıtsııa nemese medıtsına qyzmetkeri retinde tanystyrady jáne olardyń balalary nemese nemereleri jol-kólik oqıǵasyna tústi nemese zardap shekti dep habarlaıdy. Boljam boıynsha, «jábirlenýshimen máseleni sheshý» úshin belgili bir somada aqsha suraıdy. Taǵy bir nusqasy — emdeýge shuǵyl aqshanyń qajet bolýy.

Kóbinese alaıaqtar tolqyp turǵan daýyspen kómek suraıtyn úshinshi adamǵa qysqa ýaqytqa telefon tutqasyn ustatady. Ádette kútpegen jaǵdaıda jáne psıhologııalyq qysym alǵan adam tutqanyń ar jaǵyndaǵy daýys týysynyki dep qabyldaıdy jáne qajetti aqshany berýge kelisedi. Soma mln teńgege deıin jetýi múmkin.

«Qazirgi tsıfrlyq álemde alaıaqtar úshin adamdardyń derbes derekterin alý qıyn emes. Eger jaqyn adamyńyzdyń atyn estiseńiz, telefondaǵy daýys uqsas bolyp kórinse de, sheshim qabyldaýǵa asyqpańyz. Oǵan jeke qońyraý shalyńyz. Eger bul múmkin bolmasa, aqparatty qaıta tekserińiz. Polıtsııa qyzmetkerlerinen olardyń aty-jónin jáne bólimsheniń atyn suraýdy umytpańyz. Sodan keıin polıtsııaǵa qońyraý shalyńyz jáne mundaı qyzmetkerdiń jumys isteıtinin, apat nemese qońyraý shalýshy aıtqan basqa oqıǵa týraly aqparatty tekserińiz», - deıdi SQO PD bastyǵynyń orynbasary Rýslan Nazarov.

Buǵan deıin SQO-nyń úsh turǵyny alaıaqtarǵa aldanyp, 9 mln teńgesinen aıyrylǵanyn aıtqan edik.